Mae 'Pothole Land', ardal yn sir Wrecsam a gafodd sylw rhyngwladol oherwydd cyflwr ei ffyrdd, wedi cau'n swyddogol ar ôl i'r cyngor wneud gwaith atgyweirio.

Cafodd lluniau o 'Pothole Land', sef ffyrdd o amgylch Glyn Ceiriog oedd â thyllau enfawr, eu rhannu cannoedd o weithiau ar y cyfryngau cymdeithasol.

Ond mae cynghorwyr Cyngor Wrecsam wedi gwadu eu bod wedi gwneud gwaith atgyweirio nad oedd wedi ei drefnu o flaen llaw mewn ymateb i'r ymgyrch.

Yn hytrach, maen nhw'n mynnu bod y gwaith wedi'i amserlennu i ddigwydd yng nghanol mis Ionawr cyn i'r "atyniad" ddod i'r amlwg.

Mae rhai o’r tyllau gwaethaf yn yr ardal bellach wedi’u llenwi.

'Dim rhoi mewn i bwysau'

Mae arweinydd Cyngor Wrecsam, Mark Pritchard, yn rhybuddio'n erbyn y syniad mai "mynd yn firaol" yw'r ffordd orau i gyflawni pethau yn y sir.

"Dydyn ni ddim rhoi mewn i bwysau - os byddwn ni, byddai gennych chi anarchiaeth," meddai. 

"Mae gennym ni raglen adfer ar gyfer tyllau yn y ffordd yn seiliedig ar ddyfnder a blaenoriaeth.

"Rydym wedi newid y rhestr flaenoriaeth, lle’r oedd cyfran uwch o gyllid wedi’i ymrwymo i ffyrdd strategol yn flaenorol. 

"Nawr rydym wedi cyrraedd 50/50 rhwng ffyrdd strategol a ffyrdd cymunedol.

"Mae hynny’n golygu na fydd pob ffordd strategol yn cael ei gwneud ond mae’n rhaid i ni gael y cydbwysedd yn iawn."

Yn ôl dirprwy arweinydd Wrecsam, y Cynghorydd Dave Bithell, roedd y gwaith atgyweirio yn unol ag amserlen Adran yr Amgylchedd.

"Mae’n anodd cael y cydbwysedd yn iawn ond roedd y gwaith yn Nyffryn Ceiriog wedi’i gynllunio," meddai. 

"Mae’n ardal sydd wedi dioddef tirlithriadau, tywydd garw, llifogydd, mae yna faterion parhaus yn Nyffryn Ceiriog yr ydym yn ceisio eu datrys."