Bydd rhybudd melyn am rew ac eira yn parhau mewn grym i ran helaeth o Gymru fore dydd Mawrth.

Fe ddaeth y rhybudd i rym am 17.00 ddydd Llun ac fe fydd yn parhau tan 10:00 fore Mawrth.

Yn ôl y Swyddfa Dywydd, fe allai cyfnodau o eirlaw ag eira ddatblygu, gan arwain at amgylchiadau rhewllyd ar y ffyrdd.

Fe allai hyn effeithio ar drafnidiaeth mewn mannau, yn enwedig ar ffyrdd mwy anghysbell sydd heb gael eu graeanu.

Mae'r rhybudd yn berthnasol i bob sir yng Nghymru heblaw am Ynys Môn.

Wedi peth eira dros y penwythnos, roedd rhybudd melyn am eira a rhew mewn grym ar gyfer gogledd Cymru tan 12.00 ddydd Llun. 

Roedd nifer o ysgolion ar gau yn y gogledd ddwyrain ddydd Llun oherwydd y tywydd garw.