Mae’r gwaith o lenwi'r llyncdwll sydd wedi agor ar glos ym Merthyr wedi dechrau wrth i’r trigolion cyntaf ddychwelyd i’w tai.

Suddodd rhan o'r ddaear ar ystâd Nant Morlais yn ardal Pant yn gynharach y mis hwn a bu'n rhaid i 30 o deuluoedd adael eu cartrefi.   

Mae'n debyg mai glaw trwm wedi Storm Bert achosodd y difrod, wedi dau dirlithriad yn y rhanbarth. 

Mae’r cyngor yn dweud bod y twll 10 metr ar draws a 12 metr o ddyfnder wedi rhoi’r gorau i dyfu ac maen nhw wedi dechrau’r gwaith o’i ail-lenwi.

Dywedodd Brent Carter, arweinydd Cyngor Merthyr Tudful mai ateb “dros dro” oedd y cerrig presennol.

“Ar hyn o bryd, mae pibell chwe throedfedd o ddiamedr, naw metr o hyd, i mewn yno, sef pibell i ddal y dŵr sy'n dod i lawr,” meddai.

“Yna byddwn yn gosod cerrig o wahanol feintiau o wahanol faint i’w gwblhau erbyn y penwythnos, a bydd y garreg wedyn yn cael ei orchuddio am gyfnod dros dro.”

Image

Dywedodd Meurig a Sheila Price sy’n byw yno eu bod nhw’n hapus iawn i gael dychwelyd i’w cartref.

“Dyw e ddim yn beth pleserus i'w wneud, gadael eich tŷ, cloi lan a pheidio â gwybod pryd rydych chi'n mynd i ddod yn ôl,” meddai Meurig.

“Yn ffodus, rydyn ni wedi bod yn ffodus, mae’r awdurdod lleol wedi bod yn wych. 

“Fe wnaethon nhw ein cadw ni mewn cysylltiad bob dydd - rydyn ni wedi cael galwad ffôn, yn rhoi'r wybodaeth ddiweddaraf i ni, ac felly rydyn ni wedi bod yn cyfri'r dyddiau.”