Bydd gŵyl gerddoriaeth fwyaf Cymru yn cael ei chynnal ym Mannau Brycheiniog fis Awst ar ôl i’r pandemig orfodi’r trefnwyr i’w chanslo y llynedd.

Gyda thocynnau eisoes wedi gwerthu allan, bydd gŵyl Green Man yn digwydd rhwng 19-22 Awst. 

Bydd gofyn i bawb dros 16 oed brofi eu bod wedi derbyn prawf llif unffordd negyddol o fewn 48 awr o gyrraedd yr ŵyl, neu eu bod nhw wedi derbyn dwy ddos o frechlyn Covid-19. 

Bydd Cymru’n symud at lefel rybudd sero ar 7 Awst “os yw’n bosib”. Golygai hyn na fydd angen o reidrwydd i bobl gadw pellter cymdeithasol yn ystod yr ŵyl, boed hynny tu allan neu o dan do.

Mae Green Man fel arfer yn croesawu hyd at 25,000 o bobl i’r ŵyl.

Meddai perchennog yr ŵyl Fiona Stewart fod meddwl am “fod ‘nôl yn y caeau gyda’n gilydd eto” wedi “teimlo fel breuddwyd ar adegau.”

“Galla i ddim dweud wrthoch chi faint mae’n ei olygu i mi, a’r miloedd o bobl sydd yn dibynnu ar Green Man a sydd yn gyfrifol am sicrhau ei bod hi’n digwydd, bod yr ŵyl yn mynd i ddigwydd.

“Dydyn ni methu aros i weld pobl yn mwynhau’r ŵyl eto.

“Rydw i’n hynod ddiolchgar i Lywodraeth Cymru a roddodd yr hyder i mi redeg yr ŵyl eleni ac arian trwy’r Gronfa Adferiad Diwylliannol.

Mae Green Man yn ŵyl annibynnol sy’n cael ei rhedeg gan gwmni bach ym Mhowys, a byddwn ni wedi bod mewn trafferth heb y cymorth hyn.”

Gall rheiny gyda thocynnau sydd methu mynychu’r wyl gario’u tocynnau ymlaen at y flwyddyn nesaf, neu cael eu harian yn ôl tan 5yh ar 23 Gorffennaf.

Bydd tocynnau’n cael eu hailwerthu ar 27 Gorffennaf.

Pwy fydd yn perfformio?

Bydd y cerddorion Cymreig Gruff Rhys, Gwenno, Catrin Finch, a Charlotte Church ymysg yr artistiaid fydd yn perfformio yn yr ŵyl.

Rhai o brif berfformwyr yr ŵyl fydd Little Dragon, Caribou, Mogwai, Fontaines D.C. a Django Django.

Meddai Dan Snaith, sef Caribou: “Mae ‘na rywbeth hudolus am Green Man – ’dw i wedi ei deimlo yn y gorffennol, a chlywed hyn gan ffrindiau sy’n mynd bob blwyddyn. Rwy’n teimlo’n hynod o ffodus ein bod ni am fod yno fel un o’r prif artistiaid eleni.

Llun: jamssy