Mae dyn wedi’i garcharu am 24 mlynedd am droseddau rhyw yn dyddio’n ôl i’r 1970au. 

Plediodd Peter David Long, 66 oed, yn euog ar 21 Awst i chwe chyhuddiad o gyfathrach rhywiol â merch o dan 13 oed ac 13 cyhuddiad o ymosod yn anweddus. 

Roedd yr 19 trosedd yn erbyn pedair merch oedd i gyd rhwng saith ac 14 oed ar adeg y troseddu.

Yn Llys y Goron Caerdydd fe gafodd Long ei ddedfrydu i 24 mlynedd o garchar gyda blwyddyn ar drwydded a gorchymyn atal oes am bob achwynydd.

Dywedodd y Ditectif Gwnstabl Georgia Davis: “Mae’r merched hyn sy’n fodlon siarad â ni ynglŷn â gweithredoedd dirmygus Long yn golygu ei fod yn mynd i wynebu’r canlyniadau yn llawn. 

"Rwyf am eu canmol am eu cryfder drwy gydol yr ymchwiliad a phroses y llys. Cymerodd lawer iawn o ddewrder i ddod ymlaen a dweud wrthym beth ddigwyddodd.

“Bydd honiadau o droseddau rhyw bob amser yn cael eu cymryd o ddifrif gan ein swyddogion serch faint o flynyddoedd sydd wedi mynd heibio, a gobeithio bod yr euogfarn hon yn profi nad yw byth yn rhy hwyr i adrodd eich stori. Rydym wedi ymrwymo i ddod â’r rhai sy’n gyfrifol o flaen eu gwell, ni waeth pryd y digwyddodd y troseddau."

Ychwanegodd: “Rwy’n annog unrhyw un sydd wedi dioddef trosedd rhywiol i ddod ymlaen a’i riportio, gan wybod y byddwn yn ymchwilio’n drylwyr. Mae gennym swyddogion sydd wedi’u hyfforddi’n arbennig a fydd yn eich cefnogi drwy’r amser, yn ogystal ag asiantaethau partner.” 

Gorchmynnwyd Long hefyd i arwyddo'r gofrestr troseddwyr rhyw am oes.