Mae Corwynt Milton wedi cyrraedd talaith Florida gyda’r Arlywydd Joe Biden yn dweud ei fod yn disgwyl mai dyma fydd un o’r corwyntoedd “mwyaf dinistriol” ers dros ganrif.

Fe gyrhaeddodd y storm categori 3 Siesta Key yn Sarasota tua 8.30pm ddydd Mercher (1.30am ddydd Iau yn y DU).

Mae bellach wedi gwanhau i storm categori 2 gan ddod â gwyntoedd 120mya, meddai canolfan corwyntoedd cenedlaethol UDA.

Roedd dros 2m o adeiladau eisoes heb bŵer, y rhan fwyaf o amgylch ardal Tampa Bay, ac mae miliynau wedi gadael eu cartrefi i symud i ogledd y dalaith.

Wrth siarad yn y Tŷ Gwyn dywedodd yr Arlywydd Joe Biden mai dyma fydd “un o’r corwyntoedd mwyaf dinistriol yn Florida ers dros ganrif”.

Dywedodd y bydd yn achosi “dinistr anhygoel ac y gall ddileu cymunedau ac achosi marwolaethau” wrth annog pawb yn ei lwybr i wrando ar gyngor swyddogion lleol.

Mae o leiaf dau o bobl eisoes wedi’u lladd o ganlyniad i wyntoedd cryfion yn rhanbarth de-ddwyreiniol Fort Pierce, ac fe gafodd nifer eu hanafu, adroddodd NBC.

Cadarnhaodd llefarydd ar ran Ardal Dân St Lucie y marwolaethau a bod nifer o bobl eraill wedi cael eu cludo i ysbytai.

Mae disgwyl i Milton arwain at ymchwydd yn lefel y môr o hyd at 12 troedfedd mewn rhai ardaloedd ar arfordir gorllewinol poblog Florida.

Gwelodd St Petesburg hyd at 177.8mm o law mewn awr, sef gwerth mis o law i’r ddinas ar arfordir gorllewin Florida.

Image

Dim arch i’r anifeiliaid

Mae dros 1,000 o anifeiliaid yn Sw Tampa wedi eu symud i adeiladau pwrpasol ar y safle er mwyn osgoi’r corwynt.

Mae’r anifeiliaid sydd wedi eu symud yn cynnwys eliffantod Affricanaidd, fflamingos o’r Caribî, a hippos pigmi.

Bydd rhai creaduriaid yn aros yn eu cynefinoedd, gan gynnwys yr aligatoriaid a fydd yn llochesu ar waelodion eu pyllau.

“Does dim byd yn eu poeni nhw,” meddai cyfarwyddwr anifeiliaid y sw, Tiffany Burns.

Lluniau gan Wochit.