Mae'r heddlu wedi cyhoeddi enw'r bachgen wyth oed a gafodd ei saethu'n farw ar fferm yn ardal Cumbria, Gogledd Lloegr. 

Cafodd Jay Cartmell ei anafu yn ei ben a'i wyneb ar dir ger ffordd yr A66, i'r gogledd o Warcop.

Cafodd y gwasanaethau brys eu galw yno tua 2.50 brynhawn Sadwrn.  

Cafodd gwn ei ddarganfod ar y safle a chafodd y bachgen o Frizington, Cumbria ei gludo i ysbyty gerllaw mewn ambiwlans awyr. 

Bu farw rai oriau yn ddiweddarach.

Cafodd dyn yn ei 60au ei arestio ar y safle ar amheuaeth o ymosod. 

Cafodd ei gludo i orsaf yr heddlu yn ddiweddarach a'i holi ar amheuaeth o ddynladdiad trwy esgeulustod difrifol.

Mae e wedi ei ryddhau ar fechnïaeth wrth i ymchwiliad yr heddlu barhau. 

Mae Heddlu Cumbria yn apelio ar unrhyw un a welodd y digwyddiad i gysylltu â nhw. 

Llun: Frank Chalmers