Fe wnaeth myfyriwr 19 oed "bron yn sicr farw ar unwaith” ar ôl syrthio oddi ar fynydd Tryfan, clywodd cwest ddydd Gwener.

Bu farw Philip Zhu o Seaforth, Lerpwl ar ŵyl y banc 6 Mai ar ôl dioddef anafiadau difrifol i’w ben a’i asgwrn cefn.

Roedd wedi syrthio o uchder mawr ar y mynydd 3,010 troedfedd yn Nyffryn Ogwen wrth gerdded gyda’i frodyr.

Dyfarnodd y crwner John Gittins yn Rhuthun ei fod wedi marw yn ddamweiniol.

Dywedodd ei fod yn gobeithio bod ei ddau frawd a fu’n cerdded ag o “yn ymdopi a hynny ac yn delio efo’r trawma”.

Dywedodd ei frawd Andrew wrth yr heddlu eu bod nhw wedi mynd ar goll a cheisio cymryd llwybr mwy uniongyrchol i'r gwaelod,

“Roedd ar graig rydd a syrthiodd a llithro'r holl ffordd i lawr,”  meddai.

Cafodd tîm achub mynydd Dyffryn Ogwen eu galw allan. 

Roedd y brodyr wedi bod ar wyneb gorllewinol Tryfan. Aeth achubwyr i i leoliad y mae dringwyr yn ei alw yn V Cleft a dod o hyd i gorff y bachgen.

Cafodd y brodyr eu cynorthwyo oddi ar y mynydd.

Dywedodd Mr Gittins: “Doedd dim modd iddo oroesi'r anafiadau ac mae bron yn sicr ei fod wedi marw ar unwaith.”

'Balch iawn'

Clywodd y cwest fod Mr Zhu wedi gobeithio ymuno â'r Awyrlu Brenhinol.

Roedd wedi bod yn aelod o gampfa crefftau ymladd (martial arts) The Combat Unit yn Seaforth ers yn 11 oed ac yn hyfforddi plant a diffoddwyr proffesiynol.

Dywedodd ewythr y dyn ifanc, Philip Cheng, ar ôl y cwest: “Mae’r gymuned wedi torri ei chalon ond yn hynod gefnogol. 

“Mae pawb yn y gampfa, pawb yn ardal Seaforth wedi bod yn anhygoel. Ni allwn ddiolch digon iddynt. Rydym yn falch iawn o Philip am bopeth a gyflawnodd.

 “Roedd yn ddyn ifanc arbennig. Mae’n golled fawr i’n teulu.”

Fe wnaeth ei deulu godi £16,450 at ei angladd drwy wefan JustGiving.

Llun: JustGiving.