Bellach, mae'r ystafelloedd uwchben y clwb wedi eu haddasu ac yn cynnig llety, gyda llofftydd o'r enw John Lennon, Syr Paul McCartney, George Harrison, yn ogystal â Stuart Sutcliffe, sef gitarydd bas gwreiddiol y band, a Pete Best.  

Symudodd Best, sydd bellach yn 82 oed, i'r tŷ pan roedd yn 16 oed. 

Dywedodd fod ganddo atgofion melys am ei fagwraeth yno a pherfformio gyda'r band.  

Wrth ymateb i'r penderfyniad i drawsnewid y safle yn llety gwyliau, dywedodd bod hynny'n "deyrnged barhaol" i'r band a thaw breuddwyd ei fam oedd cynnig cyfle i ffans y Beatles ddilyn ôl troed eu harwyr. 

Pete Best a'i frawd ieuengaf Roag, sy'n fab i reolwr y Beatles Neil Aspinall, sydd wedi bod yn gyfrifol am y gwaith o addasu'r tŷ ers 2020. 

Dywedodd Roag: “Cefais fy ngeni yma, yn yr ystafell sydd bellach o dan yr enw McCartney Suite

“Dyma lle cefais fy magu a dyma'n cartref teuluol hyd nes i mi symud pan yn 24 oed."

Mae themâu'r Beatles yn yr ystafelloedd, yn cynnwys lluniau, posteri a gitars ar y waliau.  

Mae'r ystafell is law, o dan y ddaear wedi ei chadw fel ag yr oedd pan yn glwb, gyda drymiau yn cael eu harddangos yno.  

Dim ystafell Ringo 

Does dim ystafell wedi ei henwi ar ôl y drymiwr Syr Ringo Starr, a gafodd ei ddewis i gymryd lle Pete Best. Ond yn ôl Roag, does dim blas cas.

Dywedodd: “Does gan hynny ddim oll i wneud â Pete a Ringo a'r hyn ddigwyddodd.

“Y Beatles a berfformiodd yma oedd John, Paul, George, Pete a Stuart. Doedd Ringo ddim yn aelod pan roedd e yma.”

Roedd yr agoriad swyddogol ddydd Mercher, ond mae'r ystafelloedd wedi bod ar gael i'w harchebu ers dechrau Awst, ac mae ymwelwyr o America, Llundain a'r Alban eisoes wedi aros yno.