Mae'r gantores a'r cyflwynydd teledu Elin Fflur wedi dweud ei bod hi "mor gyffrous" wrth iddi gyhoeddi y bydd yn cyflwyno sioe radio newydd.

Ar ei rhaglen newydd nos Wener ar BBC Radio Wales rhwng 19:00 a 22:00 fe fydd hi'n chwarae caneuon o'r 70'au, 80'au a 90'au yn ogystal â chaneuon Cymraeg.

Bydd y sioe yn cael ei darlledu yn fyw o Fangor ac mae Elin Fflur yn edrych ymlaen at groesawu'r penwythnos trwy chwarae amrywiaeth o ganeuon.

"Dwi mor gyffrous i ymuno â thîm Radio Wales," meddai.

"Mae cerddoriaeth a phobl yn ddau beth dwi'n angerddol iawn drostyn nhw a dwi'n meddwl bydd y sioe hon yn rhoi'r gorau o'r ddau i mi.

"Dwi'n edrych ymlaen at groesawu'r penwythnos gyda cherddoriaeth hapus a good vibes."

Bydd Elin Fflur yn wyneb cyfarwydd i nifer o wylwyr S4C.

Mae hi'n gyflwynydd ar Heno, Cân i Gymru a Sgwrs Dan y Lloer.

Dywedodd Carolyn Hitt, Pennaeth BBC Radio Wales: “Rydym yn falch iawn o groesawu Elin i BBC Radio Wales. 

"Fel un o gantorion-gyfansoddwyr mwyaf dawnus Cymru, bydd yn rhannu ei gwybodaeth gerddorol a’i hangerdd gyda’n cynulleidfa. 

"Ac fel cyflwynydd medrus mae hi'n dod â chynhesrwydd a charisma i'r sioe. Bydd Elin yn gwmni gwych nos Wener i’n gwrandawyr.”

Llun: BBC Cymru Wales