Mae dyn 20 oed wedi marw yn dilyn gwrthdrawiad car ym Mro Morgannwg.

Cafodd Heddlu De Cymru eu galw i Ffordd y Barri yn Ninas Powys tua 03.50 fore Sul, i ymateb i wrthdrawiad.

Car Ford Fiesta llwyd oedd yr unig gerbyd ynghlwm â'r digwyddiad.

Roedd dyn 20 oed wedi marw yn y lleoliad.

Cafodd menyw 21 oed o'r Barri a menyw 18 oed o Ddinas Powys eu cludo i Ysbyty Athrofaol Cymru yng Nghaerdydd fel rhagofal.

Mae Heddlu De Cymru yn ymchwilio i'r amgylchiadau a wnaeth arwain at y gwrthdrawiad.

Dywedodd llefarydd ar ran y llu: "Mae Heddlu De Cymru yn apelio am unrhyw dystion i'r gwrthdrawiad, unrhyw un â lluniau dash-cam neu unrhyw un a welodd y modd yr oedd y car yn cael ei yrru cyn y gwrthdrawiad, i gysylltu gyda ni gan ddyfynnu’r cyfeirnod 2400233554."

Llun: Google Maps