Mae'r Blaid Lafur wedi dweud y byddan nhw'n ystyried terfynu cytundeb cwmni trenau sy'n gwasanaethu gogledd Cymru.

Mae Ysgrifennydd Trafnidiaeth yr wrthblaid, Louise Haigh, yn honni bod cwmni Avanti West Coast wedi darparu “gwasanaeth truenus” i deithwyr.

Yng Nghymru mae Avanti West Coast yn gyfrifol am ddarparu gwasanaeth trenau o Gaergybi i Euston, Llundain.

Ond mae nifer o bobl wedi bod yn cwyno am y gwasanaeth dros y blynyddoedd diwethaf.

Yn ôl y Swyddfa Rheilffyrdd a Ffyrdd, roedd Avanti West Coast y trydydd cwmni trenau mwyaf annibynadwy ym Mhrydain yn y flwyddyn hyd at ddiwedd mis Mawrth, gyda’r hyn sy’n cyfateb i un o bob 15 trên (6.9%) wedi’i ganslo.

Fe roddodd y Llywodraeth Geidwadol gytundeb hirdymor newydd i Avanti West Coast, a oedd yn dechrau o fis Hydref 2023.

Mae’r cytundeb yn caniatáu i'r cwmni wasanaethu am hyd at naw mlynedd, ond mae modd ei derfynu gyda thri mis o rybudd ar unrhyw adeg o fis Hydref 2026.

Pan gafodd Ms Haigh ei holi gan Sky News am gynllun Llafur i ddod â gwasanaethau trên o dan berchnogaeth gyhoeddus, dywedodd: “Ein hymrwymiad yw dod â’r cytundebau hynny i mewn wrth iddynt ddod i ben neu pan fyddant yn cael eu torri.

“Rwy’n rhagweld y byddaf yn ceisio cael cyngor yn gynnar ynghylch a yw Avanti wedi bod yn torri ei gontract o ystyried y gwasanaeth truenus y mae wedi bod yn ei ddarparu i deithwyr ar hyd Prif Reilffordd Arfordir y Gorllewin.”

Ychwanegodd Ms Haigh: “Dim os nac oni bai, Hydref 2026 fydd y dyddiad olaf y bydd Avanti yn cael hysbysiad o’r contract hwnnw (yn dod i ben) ond byddaf yn gofyn am gyngor cynnar ynghylch a ydynt eisoes wedi torri eu contract ac a oes modd dod ag ef i mewn yn gynharach.”

Dywedodd llefarydd ar ran Avanti: “Yn ddiweddar rydym wedi cyflwyno ein fflyd Evero newydd sydd wedi rhoi hwb i gapasiti ar y rhwydwaith.

“Mae hyn ynghyd â’n gwaith wrth adnewyddu ar ein trenau Pendolino, cyflwyno gwasanaeth premiwm safonol a’n tocyn Superfare sydd wedi gwella profiad cwsmeriaid ar ein gwasanaethau yn sylweddol.”