Mae dyn wedi cael ei arestio ar ôl i fenyw 31 oed farw mewn gwrthdrawiad yn Sir Gâr.

Digwyddodd y gwrthdrawiad rhwng y fenyw, a oedd ar feic, a cherbyd coch Seat Ibiza am tua 14:00 ddydd Sadwrn.

Roedd y car coch yn teithio ar hyd heol y B4306 o Bontyberem tuag at Hendy, tra bod y fenyw yn beicio tuag at gyfeiriad Llannon.

Bu farw'r fenyw yn y fan a'r lle.

Fe gafodd gyrrwr y car ei arestio ar amheuaeth o achosi marwolaeth drwy yrru yn beryglus.

Mae wedi cael ei ryddhau tra bod yr heddlu yn parhau â'u hymchwiliad.

Mae Heddlu Dyfed-Powys yn apelio ar dystion i gysylltu â nhw gan ddefnyddio'r cyfeirnod DP-20240309-174.