Mae cyn Ysgrifennydd Cymru Robert Buckland wedi rhybuddio am beryglon AI ‘deepfake’ cyn yr Etholiad Cyffredinol.

Mae’r dechnoleg yn caniatáu i rywun wisgo mwgwd digidol a ffugio bod gwleidyddion neu eraill wedi dweud neu wneud pethau nad ydyn nhw ddim.

Galwodd yr Aelod Seneddol sy’n wreiddiol o Lanelli ar i Lywodraeth y DU “ddangos rhywfaint o arweiniad” wrth fynd i’r afael â’r broblem.

“Y peryg ydi ein bod ni’n rhoi’r gorau i ymddiried yn unrhyw beth,” meddai.

“Bydd rhai yn dweud mai sensoriaeth yw ymdrechion i ddelio â ‘deepfakes’. Ond y nod yw amddiffyn sancteiddrwydd y gwirionedd.

“Mae’r dyfodol yma. Mae’n digwydd nawr.”

'Difrifol'

Roedd achos eisoes wedi codi yn ystod Cynhadledd y Blaid Lafur eleni pan gafodd darn o sain ei greu yn awgrymu bod Keir Starmer wedi rhegi ar ei gyd-weithwyr.

Roedd yn ffug ond roedd 1.5m o bobl wedi gwrando arno ar-lein.

Mae Robert Buckland, sydd bellach yn cadeirio Pwyllgor Dethol Gogledd Iwerddon, yn rhan o grŵp o ASau Torïaidd sydd wedi ysgrifennu at yr Ysgrifennydd Gwyddoniaeth Michelle Donelan ar y pwnc.

Dywedodd fod angen arweiniad ar gwmnïau cyfryngau cymdeithasol gyda'r nod o atal ymyrraeth mewn etholiadau.

Gallai hynny gynnwys ymyrraeth gan lywodraethau tramor, meddai.

Yr wythnos diwethaf, dywedodd Michelle Donelan fod y llywodraeth yn cymryd bygythiad posib gan ddatblygiad AI yn “ddifrifol iawn”.

“Rwy’n disgwyl erbyn yr etholiad cyffredinol nesaf y bydd gennym brosesau cadarn yn eu lle a fydd yn gallu mynd i’r afael â’r problemau hyn,” meddai wrth y pwyllgor gwyddoniaeth a thechnoleg.