Mae’r garddwr Adam Jones, neu Adam yn yr Ardd, wedi cael ei benodi’n Gyfarwyddwr Garddwriaeth newydd Sioe Frenhinol Cymru. 

Yn wyneb cyfarwydd i wylwyr S4C, fe fydd Adam, o Sir Gaerfyrddin, yn gyfrifol am “ddathlu” ac “hyrwyddo” garddio yng Nghymru, fel rhan o’i rôl. 

Mae’n awyddus i apelio at gynulleidfaoedd newydd, gan gynnwys y genhedlaeth iau, gan hefyd ddangos bod modd cael gyrfa lwyddiannus yn y maes, meddai. 

Mae’r rôl yn cynnig cyfle “arbennig” i arddangos creadigrwydd rhagorol y Cymry, gan alluogi pobl “o bob haen o’r gymuned” garddio i ddod at ei gilydd, meddai.

Wrth drafod ei benodiad gyda Newyddion S4C, dywedodd: “Dwi mor gyffrous oherwydd dwi’n gweld y Sioe Fawr fel prif lwyfan i ddathlu garddwriaeth yng Nghymru.

“Dwi eisiau dangos bod ‘na greadigrwydd yng Nghymru. 

“Mae gyda ni rhai o dylunwyr garddio gorau yn ein gwlad ni a dydyn ni ddim yn gwybod amdanyn nhw. 

“Mae ‘da ni rhai o’r gerddi gorau, mae ‘da ni rhai o’r plastai sydd â’r gerddi fwyaf anhygoel welodd y byd erioed a ‘dyn ni ddim yn dathlu hynny ar blatfform rhyngwladol, achos dyna be’ ydy’r Sioe Fawr wrth gwrs, mae’n blatfform rhyngwladol.”

Inline Tweet: https://twitter.com/adamynyrardd/status/1724478010894459261

‘Cyffrous’

Dywedodd Mr Jones ei fod yn awyddus i fynd i’r afael â heriau’r gorffennol, sy’n cynnwys prinder cyllid. 

Mae Cyfarwyddwr Garddwriaeth yn rôl wirfoddol, ac mae sawl gwirfoddolwr bellach wedi bod yn “gweithio’n galed i ymestyn a datblygu” cyfleoedd i'r dyfodol. 

Er mwyn apelio at gynulleidfa ehangach, mae Mr Jones eisiau ymdrin â phynciau llosg fel newid hinsawdd, a hynny er mwyn “adlewyrchu’r realiti” o arddio heddiw, meddai. 

“Mae ‘na gyfle newydd nawr i dynnu pobl mewn er mwyn iddyn nhw allu gweld bod garddio yn rhywbeth cyffrous. 

“Mae’n rhywbeth sy’n digwydd yng Nghymru yn arbennig o dda,” meddai. 

Fel rhan o’i rôl, mae Adam Jones hefyd am ddatblygu pentref garddwriaeth newydd ar gyfer y Sioe Frenhinol nesaf yn Llanelwedd, yn ogystal â sicrhau partneriaethau a noddwyr i gefnogi’r ymgyrch. 

“Dwi eisiau i bobl sy’n mynd i Lanelwedd y flwyddyn nesa’ bod nhw’n cyrraedd y sioe a bod nhw’n sôn am arddio. 

“Dwi eisiau i arddio fod ar flaenau tafod pawb,” meddai.