Mae gêm Scrabble bellach ar gael yn yr iaith Aeleg.

Ar ôl darganfod nad oedd fersiwn Aeleg yn bodoli, gofynnodd Dr Teàrlach Wilson, cyfarwyddwr canolfan ddiwylliannol An Taigh Cèilidh, i gwmni Tinderbox Games greu Scrabble Gaeleg.

Mae’r bwrdd a’r rheolau yn iaith Gaeleg yr Alban, ac mae acenion yn ymddangos ar rai o'r teils llafariaid, sef À È Ì Ò Ù.

Dywedodd Dr Wilson ei fod wedi chwarae Scrabble Cymraeg droeon ar hyd y blynyddoedd a'i fod yn falch bod fersiwn ar gael yn y Gaeleg bellach.

Cystadleuaeth

I lansio'r Scrabble Gaeleg, bydd canolfan An Taigh Cèilidh yn cynnal Pencampwriaethau Scrabble y Byd Gaeleg cyntaf erioed ar 2 Rhagfyr 2023. 

Dywedodd Dr Wilson: “Ni allaf aros i chwarae.

"Ond os byddaf yn ennill, bydd pobl yn meddwl ei fod wedi’i rigio ac os dwi'n colli, bydd pobl yn cwestiynu pam fod gen i PhD mewn Gaeleg.” 

Dywedodd Mr Jim Harrison, Prif Swyddog Gweithredol Tinderbox Games: "Mae’n wych gweld y fersiwn ddiweddaraf hon o Scrabble yn ymuno â’n rhifynnau Cymraeg a Gwyddeleg llwyddiannus, diolch i lawer o waith caled dros y ddwy flynedd ddiwethaf gan dîm An Taigh Cèilidh. 

"Rwy’n gobeithio y bydd pawb yn mwynhau ei chwarae cymaint ag y gwnaethon ni fwynhau ei gwneud."

Scrabble Cymraeg

Cafodd y Scrabble Cymraeg ei chyhoeddi gyntaf ym mis Medi 2005.  

Bu tipyn o ddadlau nôl yn 2016 yn sgil erthyglau a nododd nad oedd siop lyfrau Waterstones yng Nghaerfyrddin wedi gwerthu’r un o’u pum copi o’r gêm fwrdd Gymraeg ers 2014.

Fe ymatebodd nifer o bobl i'r stori ar gyfryngau cymdeithasol, gan awgrymu fod yr erthygl yn bychanu’r iaith Gymraeg.

Llun: An Taigh Cèilidh