Gyda channoedd o hediadau wedi eu canslo, mae teithwyr awyr wedi cael rhybudd i ddisgwyl oedi oherwydd nam technegol ar systemau rheoli traffig awyr y DU

Yn hwyr brynhawn Llun, cyhoeddodd y Gwasanaethau Traffig Awyr (NATS) fod y trafferthion technegol bellach wedi eu datrys.   

Rai oriau ynghynt, fe gyhoeddodd y sefydliad fod cyfyngiadau wedi eu cyflwyno ar hedfan, er mwyn sicrhau diogelwch, oherwydd nam technegol. 

Mewn datganiad, dywedodd NATS: “Ry'n ni yn profi mater technegol, ac wedi cyflwyno cyfyngiadau ar lif traffig er mwyn sicrhau diogelwch. 

“Mae peiranwyr yn gweithio i geisio datrys y broblem. Ry'n ni'n ymddiheuro am unrhyw anghyfleustra."  

Mae'r nam yn effeithio ar y gofod awyr uwchben y DU ac yn amharu ar hediadau o feysydd awyr y DU yn ogystal â hediadau i'r meysydd awyr hynny o wledydd eraill .

Daw hyn ar un o benwythnosau teithio prysuraf y flwyddyn.

Mewn datganiad brynhawn dydd Llun, dywedodd Maes Awyr Caerdydd fod eu gwasanaeth rheoli traffig awyr yn wynebu problemau technegol ar hyn o bryd.

"Rydym yn profi oedi ar hyn o bryd, cysylltwch â'ch cwmni hedfan am ragor o wybodaeth/diweddariadau."

Dywedodd prif weithredwr y maes awyr, Spencer Birns, wrth Newyddion S4C: "Mae’n siomedig bod ein cwsmeriaid yn profi oedi oherwydd problemau technegol gyda Gwasanaeth Traffig Awyr y DU (NATS).

"Rydym wedi cael gwybod eu bod yn gweithio'n galed i ddatrys y sefyllfa. Rydym yn cynghori ein cwsmeriaid i siarad â’u cwmni hedfan i gael y wybodaeth ddiweddaraf am eu teithiau."

Ymhlith y miloedd o deithwyr sydd yn wynebu oedi, mae newyddiadurwriag BBC Cymru Nest Williams. Mae hi ym Maes Awyr Palma yn Mallorca yn ceisio hedfan oddi yno i Faes Awyr Manceinion: " 'Dw i ddim yn hyderus y byddwn ni'n mynd i unman yn fuan," meddai.

"Does dim gwybodaeth yn cael ei roi i ni chwaith - dim ond i aros".

Mae maes awyr Dulyn yn adrodd fod problem gyda'r rhwydwaith yn y DU yn achosi oedi i rai hediadau, gyda maes awyr Corc hefyd yn adrodd am oedi posib i deithwyr.

Galwodd y Democratiaid Rhyddfrydol ar y Prif Weinidog Rishi Sunak i gynnal cyfarfod Cobra mewn ymateb i'r sefyllfa.

Dywedodd llefarydd trafnidiaeth y blaid, Wera Hobhouse: “Mae angen i Rishi Sunak a’i weinidogion fynd i’r afael â’r mater hwn ar frys a chynnal cyfarfod Cobra.

“Gallai miliynau o bobl ar eu gwyliau fod yn wynebu aflonyddwch enfawr yn y dyddiau nesaf oherwydd y nam hwn ac mi allwn fentro y bydd y Llywodraeth yma ar goll eto.

“Mae angen i Brydain wybod bod y Llywodraeth yn gwneud popeth o fewn ei gallu i sicrhau nad yw pobl yn cael eu taro gan oedi ac aflonyddwch mawr yn y dyddiau nesaf.”

Air Traffic Control issues in the UK today are resulting in delays to some flights into and out of Dublin Airport. We advise all passengers due to travel today to check the status of their flight with their airline in advance of travelling. pic.twitter.com/lmDeIxwb7F

— Dublin Airport (@DublinAirport) August 28, 2023

Rhybuddiodd cwmni hedfan Loganair gwsmeriaid ar blatfform cymdeithasol X, oedd yn cael ei adnabod gynt fel Twitter, y gallai teithiau hedfan fod yn destun oedi oherwydd y trafferthion technegol.

Mewn datganiad, dywedodd y cwmni o Glasgow brynhawn Llun: “Mae systemau cyfrifiadurol rheoli traffig awyr y DU wedi methu ar draws y rhwydwaith y bore yma.

“Er ein bod yn obeithiol o allu gweithredu’r rhan fwyaf o hediadau o fewn yr Alban ar sail cydgysylltu lleol a chyda chyn lleied o aflonyddwch â phosibl, efallai y bydd teithiau hedfan gogledd-de a rhyngwladol yn destun oedi.

“Os ydych chi’n hedfan gyda ni heddiw, gwiriwch ein gwefan am yr wybodaeth ddiweddaraf am eich taith cyn cychwyn am y maes awyr.”

Llun: JoeBreuer/Pixabay