Mae’r awdurdodau yn Rwsia wedi cadanrhau fod pennaeth grŵp milwyr Wagner, Yevgeny Prigozhin wedi ei ladd ar ôl i awyren gwmpo i’r ddaear yn Rwsia.

Dywedodd pwyllgor ymchwiliadau Rwsia fod profion geneteg wedi cadarnhau fod Yevgeny Prigozhin ymhlith y 10 o bobl oedd yn teithio ar yr awyren.

Roedd wedi arwain gwrthryfel yn erbyn byddin Rwsia ac wedi gorymdeithio ei filwyr Wagner i Moscow ym mis Mehefin, gan ohirio hynny ar ôl trafodaethau gyda chynghreiriad Putin ac arweinydd Belarus, Alexander Lukashenko.

Fe wnaeth hefyd gytuno i adael Rwsia am Belarus, ac roedd y Kremlin wedi dweud na fyddai’n cael ei gosbi.

Roedd Arlywydd Rwsia, Vladimir Putin wedi disgrifio gweithredoedd Prigozhin fel “brad”. 

Nid yw manylion y profion wedi eu rhyddhau ac nid yw’r wybodaeth wedi ei wirio’n annibynnol.