Mae cynllun £20m wedi ei gyhoeddi i ailddatblygu canol Bangor, gan ganolbwyntio ar ganolfan siopa fwya’r ddinas.

Mae’r cynllun yn ffrwyth cydweithio rhwng Llywodraeth Cymru, Bwrdd Iechyd Prifysgol Betsi Cadwaladr, Prifysgol Bangor a Chyngor Gwynedd.

Bydd y cynllun yn cynnwys datblygu Canolfan Iechyd a Lles newydd yng Nghanolfan Menai yn y ddinas.

Dywedodd arweinydd y cyngor Dyfrig Siencyn bod Bangor “yn anffodus” wedi “dioddef yn sgil y newidiadau yn arferion siopa a hamddena pobl”.

“Mae pobol leol wedi dweud wrthon ni eu bod nhw’n poeni am Stryd Fawr Bangor a’r nifer o siopau gwag a’r diffyg gwasanaethau,” meddai.

“Fel Cyngor, rydym yn benderfynol o sicrhau bod y ddinas hanesyddol hon yn parhau i fod yn lle bywiog ar i’r genhelaeth hon a chenedlaethau’r dyfodol i fyw, astudio, gweithio ac ymweld â hi.”

Beth yw’r cynllun?

Man cychwyn y cynllun fydd sicrhau ‘Cytundeb Opsiwn’ 18 mis ar adeilad Canolfan Menai.

Fe fydd hynny’n rhoi amser i'r cyngor a’u partnereiaid ddatblygu cynlluniau llawn ac achos busnes ar y prosiect “uchelgeisiol a chyffrous,” cyn ymrwymo i brydles tymor hir ar yr adeilad.

Wedi’r cyfnod hwn – os ydy’r partneriaid yn penderfynu bwrw ymlaen – y bwriad fydd cymryd les tymor hir ar yr uned 57,000 troedfedd sgwâr, sy’n cynnwys yr hen siop Debenhams.

Y nod ydy ail-bwrpasu a thrawsnewid y gofod presennol – a oedd yn 80% yn wag yn gynharach eleni – i ddarparu gwasanaeth iechyd a lles i bobl leol.

Bydd hyn yn ddibynnol ar Gynllun Canolfan Iechyd a Lles Bangor yn cael ei gymeradwyo a phecyn ariannol cyflawn yn cael ei gadarnhau, meddai’r cyngor.

Yn gynharach eleni fe brynodd cwmni Rob Lloyd, Bearmont Capital, safle Canolfan Menai gan dwdeud y gallai fod yn “gatalydd” i achub canol y ddinas.

Dywedodd eu bod nhw bellach wedi “sicrhau sawl tenant newydd cyffrous yn y maes manwerthu”.

“Mae gan y Ganolfan Iechyd y potensial i drwsnewid Bangor a'r ardaloedd cyfagos,” meddai.

“Bydd sefydlu Canolfan Iechyd newydd nid yn unig yn denu swyddi i ganol y ddinas ac yn cryfhau'r economi leol ond bydd hefyd yn lleddfu'r pwysau ar ysbytai presennol, gan gyfrannu at wella gwasanaethau gofal iechyd i bobl leol.”

‘Edrych ymlaen’

Dywedodd Gweinidog Economi Llywodraeth Cymru, Vaughan Gething mai’r nod oedd diogelu sector manwerthu ynghanol y dref.

“Rwy’n falch o weld bod y Cyngor yn gweithio’n agos gyda phartneriaid i sicrhau bod ystod newydd o wasanaethau cyhoeddus yn cael eu darparu yng nghanol y ddinas, fel rhan o ymdrechion i gynyddu nifer yr ymwelwyr a gwariant yn sector manwerthu’r ddinas,” meddai.

“Mae’n arbennig o braf gweld Cyngor Gwynedd yn cymryd camau pwysig i sicrhau defnydd newydd ar gyfer safleoedd canol dinas sy’n cael eu tanddefnyddio.

“Edrychaf ymlaen at weld sut y bydd eu cynlluniau’n datblygu dros y misoedd nesaf.”