Mae elusennau iechyd meddwl wedi galw am gefnogaeth i'r darlledwr Huw Edwards, wedi i'w wraig ddatgelu ei fod yn cael triniaeth yn yr ysbyty.

Dywedodd cyfarwyddwr Mind Cymru, Susan O'Leary: "Mae'n bwysig fod unrhyw un sy'n profi problemau iechyd meddwl difrifol yn cael y lle i dderbyn y driniaeth mae nhw ei angen.

"Rydan ni'n deall y bydd y straeon newyddion yn effeithio pobl mewn gwahanol ffyrdd. Mae Mind yma i gefnogi unrhyw un sydd angen help gyda'u iechyd meddwl."

Mae Huw Edwards yn lysgennad dros gangen Mind Llanelli.

Dywedodd mudiad Rethink Mental Illness y dylai "pawb oedd yn gysylltiedig a'r stori" dderbyn cefnogaeth.

Bydd pennaeth y BBC, Tim Davie, yn cael ei holi yn Senedd San Steffan yr wythnos nesaf am y modd y deliodd y gorfforaeth a'r ymchwiliad i Huw Edwards.

Bydd Mr Davie, y cadeirydd dros dro y Fonesig Elan Closs Stephens, a'r cyfarwyddwr polisi Clare Sumner yn ymddangos gerbron Pwyllgor Cyfathrebu'r Arglwyddi ddydd Mawrth.

Mae cyn gyd-weithiwr i Huw Edwards  yn ddweud ei fod yn "flin" ac yn teimlo  fod y darlledwr wedi ei "adael i lawr" ar ôl yr honiadau yn ei erbyn.

Dywedodd Jon Sopel, fu'n cydweithio a Mr Edwards am rai blynyddoedd, fod adroddiadau yn y wasg wedi "troi yn hyll".

"Roedd wedi troi mewn i gystadleuaeth i weld pwy oedd yn gallu mynd fwyaf pell yn fwyaf cyflym," meddai wrth Good Morning Britain.

Dywedodd fod ei fod wedi siarad a Huw Edwards cyn iddo fynd i'r ysbyty, a'i fod yn "gandryll" gyda'r Sun a nad oedd yn hapus ag adroddiadau'r BBC chwaith.

'Pryder'

Dydd Mercher fe wnaeth gwraig Mr Edwards ei enwi fel y cyflwynydd sydd yn wynebu honiadau iddo dalu am luniau o natur rywiol.

Dywedodd Vicky Flind bod ei gŵr yn "dioddef o broblemau iechyd difrifol" ac yn "derbyn triniaeth yn yr ysbyty ac yn aros yno am y dyfodol agos.”

Dywedodd ei fod wedi bod yn “bum diwrnod hynod o anodd i’n teulu ni”.

“Rwy’n gwneud hyn yn bennaf oherwydd pryder am ei les meddyliol ac i amddiffyn ein plant,” meddai.

"Mae Huw yn dioddef o broblemau iechyd meddwl difrifol. Fel sydd eisoes wedi ei gofnodi, mae wedi cael triniaeth am iselder difrifol yn y blynyddoedd diwethaf.

“Mae digwyddiadau’r ychydig ddyddiau diwethaf wedi gwaethygu pethau’n fawr, ac mae wedi dioddef o bwl difrifol arall ac mae bellach yn derbyn gofal yn yr ysbyty.

“Unwaith y bydd yn ddigon da i wneud hynny, mae’n bwriadu ymateb i’r straeon sydd wedi’u cyhoeddi.”

Yn gynharach ddydd Mercher, daeth cyhoeddiad gan Heddlu'r Met yn dweud bod eu hymchwiliad i'r honiadau wedi dod i ben, heb unrhyw dystiolaeth fod trosedd wedi digwydd.

Mae'r BBC bellach wedi ail-ddechrau eu ymchwiliad eu hunain, gan 'barhau i fod yn ymwybodol o’n dyletswydd i ofalu am bawb sy'n gysylltiedig a'r mater.”

Yr honiadau

Fe wnaeth papur newydd The Sun honni fod y cyflwynydd BBC wedi talu person ifanc am luniau o natur rywiol, a hynny wedi dechrau pan oedd y person ifanc y 17 oed ar y pryd. 

Yn ddiweddarach fe gysylltodd y person ifanc drwy gyfreithiwr gyda'r wasg i ddweud bod yr honiad yn "sbwriel".

Fe wnaeth ail berson honni wrth y BBC ddydd Mawrth fod y cyflwynydd wedi anfon negeseuon bygythiol ar ôl cysylltu ar ap dêtio. 

Yn ôl adroddiad arall yn The Sun, mae person 23 oed yn honni fod y cyflwynydd wedi teithio ar draws Lundain i sir wahanol yn ystod y trydydd cyfnod clo i gwrdd yn ei fflat, ym mis Chwefror 2021.

Mae Huw Edwards hefyd wedi ei gyhuddo o anfon negeseuon amhriodol at weithwyr y BBC.

Yn ôl rhaglen Newsnight y BBC mae dau aelod o staff presennol ac un cyn aelod o staff  yn honni bod Mr Edwards wedi cysylltu â nhw ar gyfryngau cymdeithasol, a bod y negeseuon wedi eu gwneud nhw i deimlo'n anghyfforddus a lletchwith.

Dywedodd dau o'r tri uchod eu bod yn teimlo na allent adrodd eu honiadau o ymddygiad amhriodol i reolwyr y BBC.

Dywedodd llefarydd ar ran y BBC: "Rydym yn cyfathrebu gyda staff a byddwn yn parhau i wneud hynny.

Rydym bob amser yn trin pryderon staff gyda gofal, a byddwn bob amser yn annog unrhyw aelod o staff i siarad â ni os oes ganddynt unrhyw bryderon."

Ymchwiliad

Dywedodd cyfarwyddwr cyffredinol y BBC fod yr achos yn parhau i fod yn gymhleth iawn ac y byddai'r ymchwiliad mewnol yn dilyn y broses briodol.

Dywedodd The Sun nad oedd yn bwriadu awgrymu bod Edwards wedi gwneud unrhyw beth troseddol ac na fydd yn cyhoeddi honiadau pellach amdano.