Mae Elon Musk wedi enwi Linda Yaccarino, cyn pennaeth hysbysebu NBCUniversal, fel prif weithredwr newydd i Twitter. 

Daw hyn ar ôl i Musk gyhoeddi ei fod wedi dod o hyd i brif weithredwr newydd ar y platfform cyfryngau cymdeithasol, a brynodd y llynedd am £35.2bn, yn gynharach ddydd Gwener. 

Bydd Linda Yaccarino, sy’n gadeirydd i Fforwm Economaidd y Byd, yn cymryd yr awenau oddi wrth Musk ymhen chwe wythnos.

Fe fydd Musk yn parhau yn gadeirydd gweithredol a phrif swyddog technolegol Twitter.

Daw’r cyhoeddiad yn dilyn cadarnhad gan NBCUniversal bod Yaccarino yn gadael ei rôl “ar unwaith” ar ôl 12 mlynedd gyda’r cwmni cyfryngau. 

Cadarnhaodd Mr Musk ar y cyfryngau cymdeithasol: “Rwy’n gyffrous i groesawu Linda Yaccarino fel prif weithredwr newydd Twitter!

“Fe fydd hi’n canolbwyntio'n bennaf ar weithrediadau busnes, tra byddaf yn canolbwyntio ar ddylunio cynnyrch a thechnoleg newydd.

“Rwy’n edrych ymlaen at weithio gyda Linda er mwyn trawsnewid y platfform i X, yr ap ar gyfer popeth,” meddai. 

Mae Musk wedi bod dan bwysau i enwi rhywun i arwain y cwmni gan ei ryddhau i ganolbwyntio ar ei fusnesau eraill.

Y llynedd, pleidleisiodd defnyddwyr Twitter y dylai Mr Musk gamu o'r neilltu mewn arolwg barn ar-lein.

Ar y pryd, dywedodd: “Does neb eisiau’r swydd a all gadw Twitter yn fyw mewn gwirionedd.”