Mae Dan Lydiate wedi ail-ymuno gyda rhanbarth y Dreigiau unwaith eto.

Fe wnaeth y blaenasgellwr gyhoeddi ym mis Mawrth ei fod yn gadael y Gweilch, ar ôl bod yno ers 2014.

Cyn hynny roedd wedi chwarae dros 100 o gemau i'r Dreigiau, lle y bydd yn chwarae ei rygbi y tymor nesaf.

Mae Lydiate yn edrych ymlaen at fod yn ôl yng Nghasnewydd a chreu mwy o atgofion gyda'r clwb, meddai.

"Mae'n wych bod yn ôl. Dwi hefo llawer o atgofion melys yma a dwi'n benderfynol i ychwanegu atynt.

"Mae llawer o chwaraewyr ifanc a thalentog gyda'r Dreigiau, a nawr dwi wedi dychwelyd dwi'n gobeithio y gallaf ychwanegu bach o brofiad, chwarae fy rhan a helpu'r tîm ar eu taith.

"Dwi'n edrych ymlaen at gychwyn. Nid oes torf well na'r dorf yn Rodney Parade pan mae'n orlawn a dwi methu aros i gynrychioli'r clwb eto."

Cafodd Lydiate ei gynnwys yng ngharfan 54 dyn Cymru ar gyfer Cwpan y Byd yn Ffrainc ym mis Medi.

Mae wedi cynrychioli ei wlad 69 o weithiau ac mae wedi sgorio tri chais.

Llun: Asiantaeth Huw Evans