Mae'r Tywysog Harry wedi gwadu 'brolio' am lofruddio aelodau o'r Taliban. 

Yn ei lyfr newydd, Spare, mae'r tywysog yn dweud ei fod wedi lladd 25 o aelodau'r Taliban wrth ymladd yn Afghanistan. Ond mae'n dweud fod honiadau ei fod yn brolio am hyn yn "gelwydd peryglus."

Wrth siarad ar y teledu yn UDA, dywedodd Harry ei fod wedi bod yn brofiad "heriol a niweidiol" wrth wylio'r ymateb i gyhoeddiad ei lyfr. 

"Heb os, y celwydd mwyaf peryglus mae pobl wedi ei ddweud ydi fy mod i rywsut wedi bod yn brolio am y nifer o bobl wnes i ladd yn Afghanistan," meddai ar raglen The Late Show. 

"Dylwn i ddweud, pe bawn i'n clywed rhywun yn brolio am y math yna o beth, byddwn i'n flin. Ond mae'n gelwydd.

"A gobeithio gan fod y llyfr allan rŵan, bydd pobl yn gallu gweld y cyd-destun."

Fe wnaeth cyn bennaeth y Llynges Frenhinol ddweud fod y tywysog wedi bod yn "wirion iawn" am roi manylion llofruddiaethau'r Taliban. Ychwanegodd ei fod yn pryderu am ddiogelwch yn ystod y Gemau Invictus yn Yr Almaen yn 2023 oherwydd eu cysylltiad uniongyrchol â Harry.