![S4C](https://ncms.s4c.org.uk/sites/default/files/styles/newyddion_large_square_1000x1000_/public/2023-01/Rhodri%20hughes.jpg?itok=wXJhcZcI)
Streic arholwyr gyrru: 'Dyw'r amser ddim yn iawn'
Streic arholwyr gyrru: 'Dyw'r amser ddim yn iawn'
Bydd arholwyr gyrru ar draws y Deyrnas Unedig yn streicio ddydd Mercher mewn anfodlonrwydd ynglŷn â thâl, amodau gwaith a phensiynau.
Ond mae hyfforddwr gyrru o’r gogledd yn cwestiynu “os mai hwn yw'r amser iawn” i streicio.
Mae'r streic yn rhan o weithredu diwydiannol gan undeb y gweithwyr cyhoeddus a masnachol - y PCS.
Mae’r Asiantaeth Safonau Gyrwyr a Cherbydau a’r Asiantaeth Taliadau Gwledig ymhlith nifer o adrannau’r llywodraeth a bleidleisiodd i streicio dros gyflogau a thelerau eraill.
Mae'r PCS yn galw am godiad cyflog o 10%. Maent hefyd eisiau gwell pensiynau, sicrwydd swydd a dim toriadau i delerau diswyddo.
Ond yn ôl y llywodraeth mae gofynion yr undeb yn "anfforddiadwy".
Wrth siarad gyda Newyddion S4C dywedodd Rhydian Hughes sy’n hyfforddwr gyrru ym Mhentrefoelas bod y streicio am achosi fwy o oedi i ddisgyblion ar ôl cyfnod Covid-19.
“Pan oedda ni’n cael rhyw fath o drefn ers Covid-19, man edrych fel bydd ‘na ddisgwyl i’r disgyblion neud profion.
“Y gwir ydy, oedda’n ni mewn argyfwng adeg Covid, o’n i methu gweithio felly dwi wedi goro dioddef ac ti’n cyrraedd rhyw safbwynt lle ti’n meddwl bod pethau yn dechrau dod yn nôl i normal a ma’ profion yn cael eu gwneud ond wedyn ma’ hyn yn digwydd.
“Mae o yn rhoi knock-on effect i fy nisgyblion ac i bobl sydd eisiau dechrau. Dwi’n gorfod deutha nhw ddisgwyl gan bo’ fi’n trio sortio criw ddaru orfod disgwyl adeg Covid.”
![S4C](https://ncms.s4c.org.uk/sites/default/files/styles/newyddion_large_square_1000x1000_/public/2023-01/Rhodri%20hughes.jpg?itok=wXJhcZcI)
'Cydymdeimlo'
Mae Mr Hughes yn cydymdeimlo gyda’r bobl ifanc sydd methu sefyll eu profion oherwydd y streicio.
“Fel rhywun sy’n gweithio yn annibynnol fel athro gyrru mae yna lot o drio cadw cwsmeriaid rhag meddwl ‘oes 'na bwynt disgwyl’ ac wrth gwrs mae o mynd i gostio mwy iddyn nhw hefyd o ran costau gwersi.
“Mae o yn amser costus i ddisgyblion a dwi’n cydymdeimlo efo nhw yn fawr iawn.
“Pan wyt ti’n 17 a bron a marw isio pasio dy brawf gyrru a bod yn fwy annibynnol a lot yn meddwl mynd i’r brifysgol ond mae 'na aros am y profion.
“Felly'r unig beth allai neud ydi ymddiheuro a disgwyl, ond mae ‘na bach o honna fi yn teimlo os mai hwn ydy’r amser cywir i ddechrau streicio?”
Dywedodd Mark Serwotka, ysgrifennydd cyffredinol y PCS, bod y streiciau yn rhan o’r “gweithredu diwydiannol anoddaf y bydd y llywodraeth yn ei wynebu ers degawdau”. Ychwanegodd y byddan nhw’n “achosi llawer iawn o aflonyddwch”.
“Ni fydd y llywodraeth, sydd wedi treulio blynyddoedd yn troi llygad ddall at ein gofynion cyflog, bellach yn gallu ein hanwybyddu,” meddai.
Dros y blynyddoedd diwethaf mae disgyblion ysgolion gyrru wedi gorfod aros yn hir am brofion oherwydd prinder arholwyr a hyfforddwyr. Bu galw uwch hefyd am brofion oherwydd effaith Covid-19.
Ym mis Awst, dywedodd yr Asiantaeth Safonau Gyrwyr a Cherbydau (DVSA) fod mwy na 500,000 o ddysgwyr yn aros am eu prawf gyrru yn y DU.
Mae Ysgrifennydd Cyffredinol newydd y TUC wedi galw am gyfarfod brys gyda Phrif Weinidog y DU mewn ymgais i ddod a'r anghydfodau diwydiannol ar draws y wlad i ben.
Galwodd Paul Nowak am newid cyfeiriad gan y llywodraeth, gan ddweud y dylai gweinidogion gynnal trafodaethau cyflog gydag undebau.
Dywedodd llefarydd ar ran y llywodraeth: “Rydym yn gwerthfawrogi gwaith gweision sifil ar draws y wlad yn fawr, ond byddai gofynion undeb y PCS yn costio £2.4bn ar adeg pan mae’n rhaid i ni ganolbwyntio ar ostwng chwyddiant er mwyn lleddfu’r pwysau ar aelwydydd ar draws y wlad.
“Bydd y trafodaethau’n parhau, ond gallwn roi sicrwydd bod gennym ni gynlluniau cynhwysfawr yn eu lle i gadw gwasanaethau hanfodol i redeg ac i leihau aflonyddwch os bydd y streiciau PCS hyn yn mynd yn eu blaenau.”
Yng Nghymru bydd y canolfannau profi canlynol yn cael eu heffeithio:
- Abertawe
- Aberteifi
- Aberystwyth
- Bangor
- Caerdydd
- Caerfyrddin
- Caernarfon
- Casnewydd
- Llanelli
- Llantrisant
- Merthyr Tudful
- Mynwy
- Pen-y-bont ar Ogwr
- Rhyl
- Wrecsam