Mae HSBC wedi cyhoeddi y bydd 12 cangen o'r banc yng Nghymru yn cau o fis Ebrill 2023. 

Daw hyn wrth i'r banc gyhoeddi y bydd 114 cangen ar draws yr DU yn cau, sydd yn gyfystyr â dros chwarter o ganghennau'r banc. 

Yn ôl y banc, mae'r defnydd o'r canghennau wedi disgyn yn sylweddol ers y pandemig, gyda rhai safleoedd yn gweinyddu llai na 250 o bobl yr wythnos. 

Daw hyn wrth i'r defnydd o fancio ar-lein gynyddu'n sylweddol.  Dywedodd HSBC bod y defnydd o'i wasanaethau digidol bron wedi treblu ers 2017. 

Er hyn, ychwanegodd y banc ei fod yn buddsoddi miliynau o bunnau er mwyn gwella a datblygu gweddill ei ganghennau sydd yn parhau ar agor. 

Nid yw'n glir faint o ganghennau fydd yn cau yng Nghymru neu ba effaith bydd y penderfyniad yn ei gael ar swyddi. 

Dywedodd cyfarwyddwr rheolwr HSBC yn y DU, Jackie Uhi, fod arferion bancio pobl wedi newid yn sylweddol dros y blynyddoedd diwethaf. 

"Mae pobl yn newid y ffordd maen nhw'n bancio ac mae'r nifer sydd yn mynd i rai canghennau ar ei lefel isaf erioed, gyda dim arwydd o newid," meddai.

"Dyw'r penderfyniad i gau cangen byth yn un hawdd, yn enwedig dim ond un sydd ar ôl mewn ardal, felly rydym wedi buddsoddi arian i helpu pobl symud i fancio ar-lein wrth i ganghennau gau."

Fe fydd y penderfyniad yn effeithio ar safleoedd yn y llefydd yma yng Nghymru: 

• Aberhonddu
• Caerdydd
• Port Talbot
• Y Fenni
• Pontypool 
• Dinbych 
• Bae Colwyn
• Cas-gwent
• Coed Duon
• Penarth
• Dinbych-y-pysgod
• Y Bontfaen