Mae'r Post Brenhinol wedi rhyddhau set newydd o stampiau sy'n dathlu nifer o gestyll y DU, gan gynnwys tri chastell yng Nghymru. 

Ymhlith yr wyth castell sydd yn y prif gasgliad mae Castell Rhaglan a Chastell Penfro, ynghyd â chestyll o'r Alban, Lloegr a Gogledd Iwerddon.

Mae trydydd castell o Gymru hefyd yn ymddangos mewn dalen arbennig o bedwar stamp sy’n dathlu cestyll brenhinol y DU.

Bydd Castell Caernarfon yn ymddangos ynghyd â Chastell Windsor, Castell Dover a Chastell Balmoral.

Mae’r prif stampiau’n cynnwys ffotograffau o gestyll sy’n dyddio o gyfnod y Normaniaid ymlaen, tra bod y stampiau brenhinol wedi’u haddurno â gweithiau celf a gomisiynwyd gan y darlunydd Rob Ball.

Nid oes cestyll o gyfnod tywysogion Cymru yn ymddangos yn y casgliad.

Dywedodd David Gold, cyfarwyddwr materion allanol a pholisi’r Post Brenhinol: "Mae cestyll ymhlith nodweddion mwyaf adnabyddus tirwedd y DU, ac mae’r rhifyn hwn yn dathlu’r sgìl, yr uchelgais a’r dyluniad sydd y tu ôl i’r strwythurau nodedig hyn."

Bydd y stampiau ar gael i’w harchebu ymlaen llaw o ddydd Iau, cyn mynd ar werth yn gyffredinol ar 21 Mai.