Mae tân yng nghyffiniau Ysbyty’r Tywysog Charles ym Merthyr Tudful wedi atal yr Ambiwlans Awyr rhag glanio ar y safle ddydd Mercher.

Dywedodd Bwrdd Iechyd Prifysgol Cwm Taf Morgannwg bod hofrenyddion yr Ambiwlans Awyr yn cael eu dargyfeirio am y tro.

O ganlyniad mae’r bwrdd iechyd wedi rhybuddio y gallai cleifion sydd angen triniaeth arbenigol frys gael eu cludo i ysbytai eraill.

Gallai hyn arwain at amseroedd trosglwyddo hirach ac oedi cyn i rai cleifion gael mynediad at driniaeth, ychwanegodd.

Mae’r bwrdd iechyd wedi pwysleisio nad yw’r digwyddiad yn effeithio ar weithrediad yr Adran Frys.

Mae Gwasanaeth Tân ac Achub De Cymru a Heddlu De Cymru yn ymateb i'r digwyddiad.

Mewn datganiad, dywedodd y bwrdd iechyd: "Efallai y bydd angen dargyfeirio cleifion sydd angen triniaeth arbenigol frys i ysbytai eraill, a gallai hynny arwain at amseroedd trosglwyddo hirach ac oedi cyn cael mynediad at ofal.

"Rydym yn gweithio gyda’n partneriaid yn y gwasanaethau brys i ddatrys y sefyllfa mor gyflym a diogel â phosib, a byddwn yn darparu rhagor o ddiweddariadau pan fyddant ar gael."

Ychwanegodd: "Hoffem dawelu meddwl y cyhoedd mai mynediad Ambiwlans Awyr yn unig sy’n cael ei effeithio gan y digwyddiad hwn. 

"Mae’r Adran Frys yn parhau ar agor, a dylai unrhyw gleifion sydd angen gofal brys neu ofal mewn argyfwng barhau i fynd yno fel arfer, neu ffonio 999 mewn argyfwng sy’n peryglu bywyd."