Bydd pleidleiswyr yn mynd i’r gorsafoedd pleidleisio ddydd Iau, Mai 7, ar gyfer etholiad Senedd Cymru.

Dyma’r tro cyntaf i’r etholiad ddefnyddio system bleidleisio gyfrannol newydd, gydag 16 etholaeth a phob un yn cael eu cynrychioli gan chwe aelod o’r Senedd. 

Mae hynny’n golygu y bydd 96 o aelodau’n cael eu hethol, o’i gymharu â 60 yn flaenorol.

Bydd gorsafoedd pleidleisio ar agor rhwng 07.00 a 22.00 ddydd Iau, ond ni fydd unrhyw ganlyniadau dros nos. 

Bydd y cyfri yn dechrau fore dydd Gwener, 8 Mai, ac mae disgwyl i’r canlyniadau cyntaf gael eu cyhoeddi yn y prynhawn.

Oherwydd ei fod yn system bleidleisio newydd mae mwy o ansicrwydd nag arfer ynglŷn â phryd fydd y canlyniadau llawn wedi eu cyhoeddi.

Mae asiantaeth newyddion PA wedi casglu amseroedd amcangyfrifedig ar gyfer cyhoeddi’r canlyniadau.

Brasamcanion yw’r amseroedd i gyd. Gallan nhw gael eu heffeithio gan oedi wrth wirio a chyfrif pleidleisiau, gan lefel y nifer a bleidleisiodd, neu gan yr angen i ail-gyfri pleidleisiau os yw’r canlyniadau’n agos.

Mae’r holl amseroedd yn cyfeirio at ddydd Gwener:

• Casnewydd Islwyn - 14:00
• Gŵyr Abertawe - 14:00
• Sir Fynwy Torfaen - 14:00
• Bangor Conwy Môn - 15:00
• Blaenau Gwent Caerffili Rhymni - 15:00
• Brycheiniog Tawe Nedd - 15:00
• Caerdydd Ffynnon Taf - 15:00
• Caerdydd Penarth - 15:00
• Ceredigion Penfro - 15:00
• Clwyd - 15:00
• Pen-y-Bont Bro Morgannwg 15:00
• Afan Ogwr Rhondda - 15:30
• Gwynedd Maldwyn - 15:30
• Pontypridd Cynon Merthyr - 16:00
• Sir Gaerfyrddin - 16:00
• Fflint Wrecsam - 17:30

Llafur oedd y blaid fwyaf yn y Senedd ddiwethaf. Roedd ganddi 29 sedd allan o 60, ychydig yn brin o fwyafrif.

Ond mae arolygon barn hyd yma yn awgrymu nad oes yr un blaid yn debygol o ennill mwyafrif yn y Senedd newydd.

Roedd arolwg barn newydd wedi ei gomisiynu gan Newyddion S4C a Phrifysgol Aberystwyth a gyhoeddwyd ddydd Mercher diwethaf yn awgrymu bod Reform UK ar y blaen.

Roedd yr arolwg gan gwmni Survation yn awgrymu bod Reform ar 29.6% o’r bleidlais, a Phlaid Cymru yn yr ail safle ar 27.8%.

Roedd arolwg a gyhoeddwyd gan gwmni More in Common ddydd Llun yn awgrymu y gallai Plaid Cymru a Reform ennill yr un nifer o seddi, sef 34 yr un.

Yn ôl yr arolwg, byddai disgwyl i'r Blaid Lafur ennill 14 sedd, gyda'r Ceidwadwyr Cymreig â naw sedd, a'r Blaid Werdd yn ennill pum sedd.

Mae'r arolwg hefyd yn awgrymu na fyddai Democratiaid Rhyddfrydol Cymru yn ennill unrhyw seddi.