Mae mwy na 330,000 o bobl wedi gorfod gadael eu tai yn Ffrainc a Sbaen o achos tanau gwyllt.

Yn Bordeaux mae'r awdurdodau yn cadw golwg ar y sefyllfa am fod y tân ryw naw milltir i ffwrdd. Mae degau o filoedd sy'n byw o amgylch y ddinas wedi gorfod ffoi. 

Yn gynharach dywedodd maer Bordeaux nad oes yna fwriad i ofyn i'r trigolion adael eu cartrefi. 

Fe fydd Arlywydd Ffrainc, Emmanuel Macron yn cynnal cyfarfod cabinet brys i drafod y sefyllfa. 

Ddydd Sadwrn fe ddywedodd y byddai Ffrainc yn "ail-adeiladu". 

Mae'r tân yn ardal Gironde, sydd yn ne-orllewin y wlad wedi achosi storm o daranau mawr meddai'r Gwasanaeth Tân. Mae'n cael ei alw yn pyrocumulonimbus.

"Dydyn ni ddim yn gwybod sut y bydd y fflamau yn ymledu," meddai llefarydd Ffederasiwn Cenedlaethol Diffoddwyr Tân Ffrainc, Eric Brocardi

"Mae ffrynt y tân yn newid yn barhaus. Allwn ni ddim ei ymladd yn uniongyrchol. 

"Mae fel brwydr rhwng Dafydd a Goliath."

'Argyfwng'

Dyma un o'r tanau coedwig gwaethaf yn Ffrainc ers yr ail rhyfel byd. Mae tua 42,000 hectar o dir wedi cael eu llosgi yn y de orllewin.

Yn Sbaen mae'r Gwasanaeth Tân wedi bod yn taclo'r fflamau ger Valencia. Mae tua 15,000 o bobl wedi gorfod gadael eu cartrefi. 

Ond mae tanau eraill hefyd wedi bod yn llosgi yn Sbaen gan gynnwys yn nhalaith Avila.

Mae Prif Weinidog Sbaen, Pedro Sanchez wedi dweud bod yna "oriau anodd o'n blaen". Mae wedi galw hefyd am "gytundeb cyhoeddus mawr ar yr argyfwng hinsawdd". 

Y gred yw bod tua 77,000 hectar wedi'u dinistrio yn Sbaen. Yn ôl Gweinidog Pontio Ecolegol Sbaen, Sara Aagesen, y tân gwyllt sy'n llosgi yn rhanbarth Ávila yw'r mwyaf yn hanes diweddar y wlad.

Ym Mhrydain mae disgwyl ton wres arall, y pedwerydd un eleni. 

Mae'r Gwasanaethau Tân wedi dweud eu bod nhw'n paratoi am danau gwyllt eraill yma. 

Llun: Reuters