Fe gafodd swyddogion y fyddin eu galw i’r ardal ddiwedd yr wythnos ddiwethaf wrth i danau niferus roi pwysau aruthrol ar wasanethau brys lleol. 

 

Mae Gwasnaeth Tân ac Achub De Cymru’n parhau i ddelio â chwe digwyddian ar draws y rhanbarth, gan gynnwys tanau gwyllt byw yn ardaloedd Blaenafon, Treherbert, Dowlais a chronfa ddŵr Llwyn-onn.

 

Yn ogystal, mae tiroedd fu ar dân yn Wattsville, Sir Caerffili, a Cwm yng Nglyn Ebwy yn “parhau i gael eu monitro” gan swyddogion, meddai’r gwasanaeth tân.

 

Bydd y milwyr sy’n dal i fod yn bresennol yn cyfrannu at yr ymdrechion yn Nowlais yn ystod y dydd cyn i’r cymorth milwrol ddod i ben yn swyddogol ar ddiwedd y dydd.

 

“Mae Gwasanaeth Tân ac Achub De Cymru’n parhau i weithio ochr yn ochr â chefnogaeth Gwydnwch Cenedlaethol gan wasanaethau tân ar draws y DU, staff milwrol ac asiantaethau partner i ymosod i chwe disgwyddiad tân gwyllt ar draws De Cymru,” meddai’r gwasanaeth.

 

Mae dau hofrennydd yn parhau i gael eu defnyddio i ddiffodd tanau a chasglu gwybodaeth, meddai’r diffoddwyr.

 

 

Mae degau o danau gwyllt wedi rhoi pwysau mawr ar wasanaethau brys mewn sawl rhan o Gymru dros yr wythnosau diwethaf, gyda’r tywydd poeth a sychder ar hyd y wlad yn cynyddu’r risg o danau.

 

Yn ogystal â thanlinellu heriau sylweddol yn deillio o dywydd eithafol a newid hinsawdd, mae’r tanau wedi amlygu ysbryd cymunedol mewn rhai ardaloedd

 

Nos Fawrth, rhannodd Heddlu’r De neges ar y cyfyngau cymdeithasol yn dangos swyddogion a diffoddwyr tân yn bwyta swper oedd wedi ei ddarparu gan bobl leol.

 

“Hoffwn ddweud diolch i gymunedau lleol am eu haelioni ac am fynd tu hwnt i ddisgwyliadau i ddarparu diodydd a physgod a sglodion i’r criw tân a swyddogion ar y safle,” meddai’r neges ar gyfrif yr heddlu yn ardal Rhondda Cynon Taf, Merthyr Tudul a Phenybont.