Mae’r Swyddfa Dywydd wedi cyhoeddi rhybudd melyn am wyntoedd cryfion a allai amharu ar deithio mewn rhannau o Gymru nos Lun ac yn ystod oriau mân y bore fore Mawrth.

Mae disgwyl hyrddiau (gusts) o hyd at 65 milltir yr awr ar arfordiroedd agored ac ar dir uchel, gyda glaw trwm ar adegau.

Bydd gwyntoedd o’r de a’r de-orllewin yn cryfhau o’r gorllewin nos Lun, gyda hyrddiau o 45 i 50 milltir yr awr yn fewndirol a rhwng 60 a 65 milltir yr awr mewn mannau mwy agored.

Mae’r rhybudd yn berthnasol i naw sir:

• Pen-y-bont ar Ogwr
• Sir Gaerfyrddin
• Ceredigion
• Conwy
• Gwynedd
• Ynys Môn
• Castell-nedd Port Talbot
• Sir Benfro
• Abertawe

Mae’r Swyddfa Dywydd yn annog pobl i fod yn ofalus ger yr arfordir, gan rybuddio y gall tonnau mawr ysgubo pobl oddi ar eu traed ac i’r môr hyd yn oed pan fyddant ar y lan.

Mae’n debygol y bydd tonnau mawr yn effeithio ar rai ffyrdd a chymunedau arfordirol.

Dylai pobl sy’n cerdded ger clogwyni fod yn gyfarwydd â’u llwybr a chadw cŵn ar dennyn. Mewn argyfwng ar yr arfordir, dylid ffonio 999 a gofyn am Wylwyr y Glannau.

Mae oedi’n debygol ar y ffyrdd ac i wasanaethau trenau, bysiau, awyrennau a fferïau. Fe allai cerbydau uchel hefyd wynebu oedi ar ffyrdd a phontydd agored.

Mae posibilrwydd y bydd toriadau i gyflenwadau trydan a gwasanaethau eraill.

Mae cyngor hefyd i wirio cyflwr y ffyrdd ac amserlenni trafnidiaeth cyn teithio, ac i baratoi ar gyfer unrhyw doriadau trydan drwy gasglu eitemau fel tortshis, batris a gwefrydd cludadwy ar gyfer ffôn symudol.

Bydd y gwyntoedd yn gwanhau o’r gorllewin yn ystod yr oriau mân, cyn cryfhau eto ar draws rhannau gogleddol o’r DU yn gynnar fore Mawrth.

Mae’r Swyddfa Dywydd yn cynghori pobl i gadw golwg ar y rhagolygon diweddaraf, gan y gall rhybuddion newid yn gyflym.