Mae Flávio Bolsonaro wedi galw am ddiddymu canlyniad etholiad arlywyddol Brasil yn dilyn buddugoliaeth annisgwyl ei wrthwynebydd, Luiz Inácio Lula da Silva.

Cafodd Lula, yr ymgeisydd asgell chwith, ei ail-ethol yn arlywydd, yn groes i ragolygon y polau piniwn.

Yn rownd gyntaf yr etholiad yn gynharach y mis hwn, cafodd Bolsonaro dros 2.2 miliwn yn fwy o bleidleisiau na Lula.

Roedd y bleidlais ddydd Sul yn ail rownd rhwng y ddau ymgeisydd blaenllaw.

Bron i ddwy awr ar ôl cyhoeddi'r canlyniad, dywedodd Bolsonaro, gwleidydd asgell dde 45 oed sy'n fab i'r cyn-arlywydd Jair Bolsonaro sydd yn y carchar, nad oedd modd derbyn y canlyniad. Dywedodd y byddai'n galw am ddiddymu'r etholiad.

Beirniadodd Bolsonaro benderfyniad gan farnwr yn Uchel Lys Brasil i ymestyn yr oriau pleidleisio, gan ddweud ei fod yn "newid rheolau'r gêm".

Daeth y penderfyniad dri munud cyn i'r gorsafoedd pleidleisio gau am 17:00, gan achosi dryswch gan fod rhai ohonynt eisoes wedi cau.

"Mae'n amhosib cydnabod canlyniadau'r etholiad yng nghyd-destun y pethau hyn sydd wedi digwydd," meddai Flávio Bolsonaro.

Roedd y ddau ymgeisydd bron yn gyfartal drwy gydol y cyfrif nos Sul, nes i Lula fynd ar y blaen ychydig ar ôl hanner nos, amser y DU.

Mae buddugoliaeth Lula yn golygu y bydd y dyn 80 oed yn gwasanaethu pedwerydd tymor fel arlywydd, rhywbeth nad oes neb wedi'i wneud o'r blaen.

Wrth annerch ei gefnogwyr, diolchodd Lula i bobl Brasil a beirniadu Bolsonaro.

"Rhaid i mi gyfaddef fy mod yn teimlo embaras bob tro roeddwn yn cymryd rhan mewn dadl," meddai.