Ym mhentref Rhostryfan ger Caernarfon, mae ‘na fenter newydd ar droed. Papur bro newydd sbon a dau gefnder 13 oed sydd tu ôl i’r cyfan.

Mae Celyn a Caio, sy’n ddisgyblion yn Ysgol Syr Hugh Owen, wedi mynd ati i sefydlu papur bro newydd – Papur y Bobl.

Mae’n bapur “llwyddiannus iawn” yn ôl Celyn, ac maen nhw wedi ei ddosbarthu i dros 41 o dai gwahanol.

“Dwi wedi dod i adnabod y gymuned, a dwi wrth fy modd yn cymysgu efo pobl eraill wrth ei ddosbarthu o,” meddai Celyn.

Celyn yw gohebydd y papur, ac felly ei swyddogaeth ydi ysgrifennu a dod o hyd i straeon. Er bod y papur yn un wythnosol, dydi dod o hyd i straeon newydd yn ddim problem iddo.

Image

“Gan bod ni’n nabod pawb yn y pentre’, ‘da ni’n gwybod sut i roi cyfweliadau i bobl a lle mae nhw’n byw,” meddai.

“Da’ ni wrth ein boddau yn ffeindio straeon gwahanol, a da’ ni’n ffeindio petha’ bob wythnos so ma’ hynny yn beth da."

Mae gan Papur y Bobl wasanaeth digidol hefyd, a Caio yw’r un sy’n gyfrifol am yr ochr yna.

“Fy rhan i yn y papur bro, rhan fwyaf o’r amser fi ydy’r adran technegol o bob dim,” meddai Caio.

“Felly fi sy’n rhoi bob dim ar YouTube, editio pob dim a da’ ni’n neud podlediad hefyd."

Mae Caio o’r farn bod nhw’n gwneud “gwaith pwysig”.

“Dwi’n meddwl bod o’n rhoi llais i bobl y pentre’ a rhoi lle i’r gymuned siarad," meddai.

Yn ôl y ddau, gwaith tim effeithiol yw’r allwedd tu ôl i’r cyfan.

“Da’ ni’n ffreuo yn aml ond diwrnod newydd a da’ ni’n iawn wedyn,” meddai Caio.

“Byse fi ddim yn gallu neud hyn heb Celyn, a ma’ siŵr fyse Celyn yn dweud hebdda fi fyse fo methu chwaith, do da’ ni angen gweithio efo ein gilydd i gadw’r papur bro i fynd."

Wrth i Bapur y Bobl fynd o nerth i nerth, mae gan y cefndryd yma gynlluniau mawr.

“Fyswn i wrth fy modd yn bod yn newyddiadurwr, neu yn ohebydd, fyswn i wir wrth fy modd," meddai Celyn.