Ceredigion yn ennill Eisteddfod CFfI Cymru 2026
Mae Ffederasiwn Clybiau Ffermwyr Ifanc Ceredigion wedi ennill Eisteddfod CFfI Cymru 2026, wrth i'r gystadleuaeth gael ei chynnal yn y sir eleni.
Daeth Ceredigion i'r brig gan ennill Tlws Mansel Charles, gyda Sir Benfro a Sir Gaerfyrddin yn gydradd ail.
Cafodd yr Eisteddfod ei chynnal ym Mhafiliwn Bont, Pontrhydfendigaid, ddydd Sadwrn, gyda dros 800 o gystadleuwyr o 12 ffederasiwn sirol yn cymryd rhan.
Roedd y cystadlaethau'n cynnwys cerddoriaeth, llefaru, adloniant ysgafn, gwaith cartref, ysgrifennu creadigol, celf a ffotograffiaeth.
Yn ogystal â chipio'r brif wobr, Ceredigion ddaeth i'r brig yn yr adran gwaith cartref, gan ennill Tlws Undeb Amaethwyr Cymru Sir Ddinbych.
Enillodd Cari Davies o Geredigion Gwpan CFfI Cymru am y perfformiad llefaru gorau hefyd.
Y Gadair a'r Goron
Un o uchafbwyntiau'r Eisteddfod oedd llwyddiant Daniel Evans o CFfI Pontsiân, a enillodd y Gadair a'r Goron.
Daniel yw'r ail berson yn hanes yr Eisteddfod i ennill y ddwy brif wobr lenyddol yn yr un flwyddyn.
Wrth siarad ar ôl ei fuddugoliaeth, dywedodd Daniel: "Mae'n dipyn o fraint. Mae'n fraint ennill y dwbl."
Dywedodd hefyd fod ennill y ddwy wobr yng Ngheredigion, gyda'r Eisteddfod yn cael ei chynnal yn ei sir ei hun, yn gwneud y llwyddiant yn fwy arbennig.
Roedd Daniel eisoes wedi ennill y Gadair a'r Goron yn Eisteddfod CFfI Ceredigion eleni.
Y dasg ar gyfer cystadleuaeth y Gadair oedd cyfansoddi cerdd ar y thema 'Bwlch neu Bylchau', tra bod cystadleuaeth y Goron yn gofyn am ddarn o ryddiaith ar y thema 'Y Gêm'.
Cafodd y Gadair ei chreu gan y brodyr Bleddyn ac Owain Thomas o CFfI Felinfach, a'r Goron gan Dylan ac Elen Bowen o Gemwaith Bowen, Castellnewydd Emlyn.
Bydd Daniel hefyd yn cael gwahoddiad i ymuno â'r Orsedd yn Eisteddfod Genedlaethol Cymru 2027.
Gwobrau eraill
Sir Gaerfyrddin enillodd Darian Elonwy Phillips am y ffederasiwn fuddugol yn y cystadlaethau llwyfan.
Daeth Meirionnydd i'r brig yn y gystadleuaeth côr cymysg, gan ennill Cwpan Dyffryn Tywi, gyda Cheredigion yn ail a Chlwyd yn drydydd.
Roedd pum côr wedi cymryd rhan yn y gystadleuaeth, gan berfformio'r darn 'Drws Nesa Dros y Don' gan Eric Jones.
Ymhlith enillwyr unigol eraill y dydd roedd Sioned Beynon o Sir Gaerfyrddin, a enillodd Gwpan Ardudwy am y perfformiad unawd cerddorol gorau.
Enillodd Alys Wyn Jones o Glwyd Gwpan Parcwilws am y perfformiad unigol gorau mewn cystadleuaeth unawd sioe gerdd neu ffilm.
Owain Jenkins o Sir Benfro enillodd Gwpan Joy Cornock am y cystadleuydd mwyaf addawol.
Ceredigion oedd yn gyfrifol am gynnal yr Eisteddfod eleni, gydag Enfys Hatcher Davies yn Gadeirydd a Heledd Williams yn Llywydd.
Mae CFfI Cymru wedi diolch i'r cystadleuwyr, y gwirfoddolwyr a'r trefnwyr am eu gwaith wrth gynnal yr Eisteddfod.
Meirionnydd fydd yn cynnal Eisteddfod CFfI Cymru 2027 yn Y Rhyl.
