Mae dyn 57 oed yn derbyn triniaeth yn yr ysbyty yn dilyn ymosodiad ger gorsaf betrol ym Mhontcanna, Caerdydd.

Dywedodd Heddlu De Cymru eu bod yn ymchwilio i ymosodiad gafodd ei adrodd am tua 02:30 fore Mercher ar Heol y Gadeirlan, ger garej Esso.

Roedd y garej ar gau am gyfnod wrth i swyddogion ymchwilio i’r digwyddiad, ond fe ailagorodd toc wedi 08:00 fore Mercher.

Cafodd y dyn ei gludo i Ysbyty Athrofaol Cymru yng Nghaerdydd, lle mae’n parhau i dderbyn triniaeth.

Mae dynes 41 oed wedi cael ei harestio ar amheuaeth o achosi clwyf gyda’r bwriad o achosi niwed difrifol ac o ymosod ar weithiwr gwasanaethau brys.

Dywedodd yr heddlu fod y rhai oedd ynghlwm â’r digwyddiad yn adnabod ei gilydd a bod ymholiadau’n parhau.