Vitor Matos yn gadael Abertawe i fod yn brif hyfforddwr RC Strasbourg

Vitor Matos

Mae prif hyfforddwr Clwb Pêl-droed Abertawe, Vitor Matos, wedi cael ei benodi'n brif hyfforddwr newydd RC Strasbourg yn Ffrainc.

Fe gyhoeddodd y clwb o Ligue 1 y newyddion nos Fercher, er nad yw Abertawe wedi cadarnhau ymadawiad yr hyfforddwr o Portiwgal eto.

Cafodd Matos, 38 oed, ei benodi'n brif hyfforddwr Abertawe ym mis Tachwedd 2025, yn dilyn diswyddiad Alan Sheehan.

Roedd o dan gytundeb gyda'r Elyrch tan 2030, ac yn ôl adroddiadau, mae disgwyl i Abertawe dderbyn tua £5 miliwn mewn iawndal.

Mae Strasbourg o dan yr un berchnogaeth â Chelsea, ac yn y 13eg safle yn Uwch Gynghrair Ffrainc ar hyn o bryd.

Cyfnod Matos yn Abertawe

Roedd yr Elyrch yn yr 20fed safle ym Mhencampwriaeth Lloegr pan gyrhaeddodd Matos, gyda'r clwb yn wynebu brwydr i osgoi disgyn o'r gynghrair.

Llwyddodd Matos i drawsnewid perfformiadau'r tîm, gan ennill 14 o'i 30 gêm gynghrair yn ystod gweddill y tymor.

Gorffennodd Abertawe dymor 2025-26 yn yr 11eg safle gyda 64 pwynt.

Mae'r Elyrch wedi mwynhau dechrau cadarnhaol i'r tymor presennol hefyd, gyda'r tîm yn y chweched safle yn y Bencampwriaeth ar ôl casglu 26 pwynt o 15 gêm.

Pwy fydd yn cymryd yr awenau?

Yn ôl adroddiadau, mae'r cyn-gapten Ashley Williams mewn trafodaethau ynglŷn â dychwelyd i Abertawe fel rhan o dîm hyfforddi dros dro.

Fe allai ymuno â Leon Britton a Kristian O'Leary wrth i'r clwb chwilio am brif hyfforddwr parhaol.

Nid yw Abertawe wedi cadarnhau'r trefniadau eto.

Bydd yr Elyrch yn croesawu West Bromwich Albion ddydd Sadwrn, cyn teithio i Middlesbrough ddydd Mawrth.

Yna bydd y clwb yn wynebu Caerdydd yn Stadiwm Swansea.com ddydd Sul 29 Tachwedd.

Newyddion diweddaraf

Mae'r wefan hon yn defnyddio cwcis i sicrhau eich bod chi'n cael y profiad gorau ar ein gwefan.