Mae cwmni Kellogg's wedi rhoi'r gorau i ddefnyddio grawn reis yn ei rawnfwyd Rice Krispies bellach, a hynny o achos newidiadau yn y tywydd sy'n effeithio ar ansawdd ac argaeledd reis.

Mae'r cwmni bellach yn defnyddio blawd reis yn lle grawn reis yn Rice Krispies, tra bod Coco Pops yn cynnwys cymysgedd o flawd reis a blawd corn.

Mae'r newid hefyd yn golygu bod y ddau gynnyrch bellach yn cynnwys glwten gwenith, gan eu gwneud yn anaddas i bobl sydd â chlefyd seliag neu alergedd i wenith.

Dywedodd llefarydd ar ran Kellogg's wrth gylchgrawn The Grocer: "Mae'r newid diweddar hwn yn ein helpu i gynnal ansawdd cyson wrth i newidiadau yn y tywydd effeithio ar ansawdd ac argaeledd peth o'r reis a'r grawn sy'n cael eu defnyddio yn ein grawnfwydydd.

"Rydym yn sylweddoli y gall hyd yn oed newidiadau bach i gynnyrch poblogaidd fod yn amlwg, a dyna pam ein bod wedi mynd ati'n ofalus iawn."

Fe ychwanegodd y llefarydd fod y ryseitiau newydd wedi cael eu profi'n ofalus o ran blas, ymddangosiad a gwead, a bod y cwmni'n parhau i wrando ar adborth gan gwsmeriaid.

Pryderon am alergeddau

Mae Nadim a Tanya Ednan-Laperouse, a sefydlodd elusen alergeddau Natasha's Foundation ar ôl marwolaeth eu merch 15 oed o adwaith alergaidd yn 2016, wedi mynegi pryder am y newid.

"Mae'n drueni na fydd y grawnfwydydd poblogaidd hyn bellach yn ddewis diogel i frecwast i bobl sydd ag alergedd i wenith neu glefyd seliag."

Fe wnaethon nhw rybuddio y gallai'r newid roi pobl ag alergeddau mewn perygl difrifol os nad ydynt yn cael gwybod amdano'n glir.

Cyn y newid, roedd pecynnau Rice Krispies a Coco Pops yn cynnwys rhybudd y gallai'r cynhyrchion gynnwys glwten oherwydd y posibilrwydd o groeshalogi yn ystod y broses gynhyrchu.

Ond mae glwten gwenith bellach yn gynhwysyn yn y ddau gynnyrch, ac mae'n rhaid i'r cwmni nodi hynny'n glir ar y pecynnau.

Yn ôl Kellogg's, nid yw lefelau ffibr, fitamin D na haearn y grawnfwydydd wedi newid, ac nid ydynt yn cynnwys lliwiau, blasau na melysyddion artiffisial.