Mewn diwrnod hanesyddol mae'r Democratiaid wedi ennill rheolaeth dros y Senedd a Thŷ'r Cynrychiolwyr yn etholiadau canol tymor yr Unol Daleithiau.

Mae'r canlyniad yn golygu mai nhw fydd yn rheoli'r Gyngres am weddill cyfnod Donald Trump fel arlywydd.

Fe enillodd y Democratiaid fuddugoliaethau mewn ardaloedd sydd wedi bod yn gadarnleoedd i'r Gweriniaethwyr yn hanesyddol, gan gynnwys yn Texas, Ohio a Kansas.

Wrth siarad â Fox News ar ôl i'r Gweriniaethwyr golli rheolaeth dros y Senedd, dywedodd Trump ei fod wedi cael sioc. 

“Wel, dwi wedi synnu rhywfaint. Roeddwn i’n meddwl y bydden nhw’n gwneud yn well. Fe gawson ni ralïau enfawr,” meddai.

“Roeddwn i’n meddwl y gallwn i droi’r gefnogaeth honno’n bleidleisiau i’r ymgeiswyr.”

Ond mewn neges ar y platfform Truth Social, dywedodd Trump y byddai pethau wedi bod yn wahanol pe bai ei enw ar y papur pleidleisio.

Cafodd y Seneddwr Democrataidd Jon Ossoff ei ailethol yn Georgia, talaith oedd yn un o brif dargedau'r Gweriniaethwyr.

Mae'r dyn 39 oed yn cael ei ystyried yn ddarpar ymgeisydd ar gyfer etholiad arlywyddol 2028, ac mae wedi bod yn un o brif feirniaid arlywydd yr Unol Daleithiau.

Dywedodd Ossoff wrth ei gefnogwyr fod pobl America wedi “gwrthod anfoesoldeb, llygredd ac anghymhwysedd yr arlywydd aflwyddiannus Donald J Trump”.

Fe enillodd James Talarico etholiad i'r Senedd yn Texas, gan ddod y Democrat cyntaf i ennill yno ers bron i 40 mlynedd. 

Mae'r ymgeisydd Democrataidd Abdul El-Sayed hefyd yn honni ei fod wedi cipio'r sedd yn Michigan.

Roedd hon yn un o'r seddi mwyaf dadleuol oherwydd ymosodiadau personol Trump ar El-Sayed yn yr wythnosau cyn yr etholiadau canol tymor.

Roedd Haley Stevens, a oedd wedi cystadlu yn ei erbyn am enwebiad y Democratiaid, wedi annog pleidleiswyr ar y funud olaf i gefnogi'r ymgeisydd Gweriniaethol, Mike Rogers.

Wrth annerch ei gefnogwyr, dywedodd El-Sayed eu bod wedi “mentro cefnogi'r ymgeisydd mwyaf annhebygol”.

Ychwanegodd fod yr ymgyrch wedi bod yn un fudr a oedd yn canolbwyntio ar ei ffydd Fwslimaidd.

Llwyddodd y blaid hefyd i gipio cyfres o seddi oddi ar y Gweriniaethwyr yn Nhŷ'r Cynrychiolwyr mewn taleithiau fel Kentucky, New Jersey a Gogledd Carolina.

Bydd y Democratiaid nawr yn gallu rhwystro rhai o gynlluniau Trump yn ystod y ddwy flynedd nesaf.

Llun: Reuters / Kevin Lamarque