Mae plismon oedd wedi ei leoli yn Llanelli wedi cael ei ddiswyddo ar unwaith ar ôl i banel ddyfarnu ei fod wedi camymddwyn yn ddifrifol.

Cafodd PC Rhodri Davies ei ddiswyddo o Heddlu Dyfed-Powys yn dilyn gwrandawiad camymddwyn cyhoeddus ym mhencadlys y llu yn Llangynnwr, ger Caerfyrddin rhwng dydd Llun 19 Hydref a dydd Iau 22 Hydref.

Roedd y plismon yn wynebu honiadau ei fod wedi ceisio meithrin perthynas rywiol ac emosiynol â swyddog heddlu arall, er ei fod yn gwybod neu'n amau bod y swyddog wedi dioddef cam-drin domestig.

Cyfeiriwyd at y swyddog fel 'Tyst A' yn ystod y gwrandawiad.

Roedd honiadau hefyd fod y swyddog wedi dioddef ymddygiad rhywiol digroeso gan PC Davies.

Roedd honiadau pellach yn ymwneud â digwyddiad ym mis Hydref 2023, pan oedd PC Davies yn cymryd datganiad gan dyst mewn cysylltiad â digwyddiad o ddwyn o archfarchnad.

Yn ôl yr honiadau, roedd wedi gwneud sylwadau amhriodol wrth y tyst, y cyfeiriwyd ato fel 'Tyst B', ac wedi cadw rhif ffôn y tyst ar ei ddyfais bersonol er mwyn ceisio meithrin perthynas rywiol neu emosiynol.

Daeth y panel, dan gadeiryddiaeth Ian Arundale, i'r casgliad bod yr honiadau yn erbyn PC Davies wedi eu profi a'i fod wedi torri safonau ymddygiad proffesiynol yr heddlu.

Roedd y rhain yn cynnwys torri rheolau ynghylch bod yn onest, cadw gwybodaeth yn gyfrinachol, trin eraill â pharch, a pheidio ag ymddwyn mewn ffordd sy'n dwyn anfri ar yr heddlu.

Dyfarnodd y panel fod ei weithredoedd yn gyfystyr â chamymddwyn difrifol a bod yn rhaid ei ddiswyddo ar unwaith.

Bydd ei enw bellach yn cael ei ychwanegu at restr wahardd Coleg Plismona Cymru a Lloegr, gan ei atal rhag dychwelyd i wasanaeth yr heddlu.

'Ymddygiad cwbl annerbyniol'

Wrth ymateb i'r penderfyniad, dywedodd Dirprwy Brif Gwnstabl Heddlu Dyfed-Powys, Gemma Morris, fod disgwyl i bob swyddog ac aelod o staff gynnal y safonau proffesiynol uchaf, boed ar ddyletswydd neu beidio.

“Roedd ymddygiad PC Rhodri Davies yn gwbl annerbyniol," meddai. 

"Daeth y panel i’r casgliad bod yr honiadau yn ei erbyn wedi eu profi ac mae wedi cael ei ddiswyddo o’r llu.

“Mae Heddlu Dyfed-Powys wedi ymrwymo i fynd i’r afael ag unrhyw ymddygiad sydd ddim yn cyrraedd y safonau o ran gonestrwydd a phroffesiynoldeb rydyn ni’n eu disgwyl gan ein swyddogion a’n staff. Byddwn yn cymryd camau priodol lle bynnag y byddwn yn dod ar draws camymddwyn.

“Rwy’n canmol y tystion am eu dewrder wrth roi gwybod am ymddygiad PC Davies, ac am eu cryfder drwy gydol y broses o ymchwilio i’r camymddwyn, gan gynnwys rhoi tystiolaeth yn y gwrandawiad yr wythnos hon.”