Mae Angela Rayner wedi dweud ei bod wedi cael ei chlirio o unrhyw gamweithredu bwriadol mewn ymchwiliad i'w materion trethi.

Fe allai ei chyhoeddiad agor y drws ar gyfer ymgais bosib am arweinyddiaeth y Blaid Lafur yng nghanol yr holl ansicrwydd am ddyfodol Syr Keir Starmer.

Wrth i'r Ysgrifennydd Iechyd Wes Streeting ystyried a ddylid herio'r Prif Weinidog am yr arweinyddiaeth, nid yw Rayner, cyn-ddirprwy Syr Keir, wedi diystyru ymgeisio ei hun am y brif swydd - ond dywedodd na fyddai'n "sbarduno" cystadleuaeth.

Dywedodd Ms Rayner, yr aelod seneddol dros Ashton-under-Lyne, wrth The Guardian fod yr ymchwiliad i'w thaliad treth stamp, a arweiniodd at ei hymadawiad o'r Llywodraeth, wedi ei gwblhau.

Dywedodd: "Byddaf yn chwarae fy rhan i wneud popeth o fewn ein gallu i gyflawni'r newid, oherwydd nid uchelgais bersonol yw hi, rwy'n gwybod y gwahaniaeth y mae'n ei wneud."

Taro bargen

Mewn cyfweliad ag ITV, fe wnaeth Rayner wadu ei bod wedi taro bargen gyda Maer Manceinion Andy Burnham am yr arweinyddiaeth.

Mae Burnham yn enw sydd yn cael ei gysylltu gyda'r frwydr am arweinyddiaeth y Blaid Lafur, ond fe fyddai angen iddo ennill isetholiad yn gyntaf cyn gallu dychwelyd i Dŷ'r Cyffredin er mwyn cynnal unrhyw her.

"Nid wyf yn gwneud bargeinion" meddai Angela Rayner wrth ITV.

Mewn datganiad yn nodi'r ffaith nad oedd hi bellach yn destun ymchwiliad i'w materion trethi gan adran Cyllid a Thollau ei Fawrhydi, dywedodd Ms Rayner:

“Rwyf bob amser wedi ceisio gweithredu gyda gonestrwydd, ac rwy’n credu y dylid dal gwleidyddion i safonau uchel - dyna pam y gwnes i ymddiswyddo o’r Llywodraeth a chydweithredu’n llawn â Cyllid a Thollau ei Fawrhydi.

“Roeddwn i eisiau sicrhau fy mod wedi talu pob ceiniog yr oedd yn ei ddyledus, ac rwyf wedi gwneud hynny. Rwy’n falch y gall fy nheulu symud ymlaen nawr - a’m bod yn gallu bwrw ymlaen â fy swydd.”

“Rwy’n croesawu casgliad Cyllid a Thollau ei Fawrhydi, sydd wedi fy nghlirio o unrhyw gamwedd.

“Rwyf wedi cael fy rhyddhau gan Cyllid a Thollau ei Fawrhydi o’r cyhuddiad fy mod wedi ceisio osgoi treth yn fwriadol."

Ychwanegodd: “Wrth brynu cartref fy hun gyda morgais, nid oeddwn yn berchen ar unrhyw eiddo arall ac nid oedd gennyf unrhyw fuddiant ariannol personol yn yr ymddiriedolaeth a gyfarwyddwyd gan y llys a sefydlwyd i reoli dyfarniad ariannol fy mab. Cefais gyngor gan arbenigwyr y dylwn dalu treth stamp ar y gyfradd safonol.

“Penderfynais dalu’r swm cywir o dreth. Cymerais ofal rhesymol a gweithredais yn ddidwyll, yn seiliedig ar y cyngor arbenigol a gefais, ac mae Cyllid a Thollau ei Fawrhydi wedi derbyn hyn."