'Newyddion mawr': Cyhoeddi cyllid i ddwy fferm wynt oddi ar arfordir Cymru
Mae Llywodraeth y DU wedi cyhoeddi bod dwy fferm wynt oddi ar arfordir Cymru wedi sicrhau cyllid i gyflenwi ynni i'r grid cenedlaethol.
Dywedodd Llywodraeth y DU y bydd yn datblygu prosiect Awel y Môr oddi ar arfordir Sir Ddinbych a phrosiect Erebus oddi ar arfordir Sir Benfro.
Daw'r newyddion wrth i Lywodraeth y DU sicrhau record o 8.4 gigawat (GW) o bŵer gwynt ar y môr ar gyfer eu cynlluniau ynni gwyrdd.
Mae'r rownd ddiweddaraf o gontractau yn cynnwys chwe phrosiect newydd wedi'u lleoli oddi ar yr arfordir mewn gwahanol rannau o'r DU.
Mae prosiectau tu allan i Gymru yn cynnwys Berwick Bank ym Môr y Gogledd – un o'r ffermydd gwynt mwyaf yn y byd.
Mae dau brosiect arall yn Dogger Bank South, oddi ar arfordir Sir Efrog, a Norfolk Vanguard, oddi ar arfordir Dwyrain Anglia.
Mae'r contractau'n cael eu hystyried yn gam pwysig wrth gyflawni ymrwymiad Llywodraeth y DU i ostwng biliau drwy ddarparu pŵer glân erbyn 2030.
Dywedodd yr Adran Diogelwch Ynni a Net Sero y byddai'r prosiectau newydd yn cynhyrchu digon o drydan i bweru 12 miliwn o gartrefi.
Mae'r adran hefyd yn dweud y bydd y prosiectau'n cefnogi 7,000 o swyddi ac yn helpu'r DU i fynd i'r afael â'r argyfwng hinsawdd.
Mae pris ynni gwynt ar y môr 40% yn is na chost adeiladu a gweithredu gorsaf bŵer nwy newydd, yn ôl metrig allweddol yn y diwydiant.
'Newyddion mawr'
Dywedodd Ysgrifennydd Gwladol Cymru, Jo Stevens, bod y cyhoeddiad yn "newyddion mawr" i Ogledd Cymru a Sir Benfro.
"Mae’n bleidlais enfawr o hyder yn niwydiant ynni glân Cymru sydd eisoes yn darparu swyddi medrus iawn â chyflog da ar gyfer y dyfodol gyda’r potensial i ddod â miloedd mwy," meddai mewn datganiad.
"Mae Llywodraeth y DU yn gweithio gyda buddsoddwyr i ddatblygu pŵer glân cartref a fydd yn sicrhau ein cyflenwad ynni ac yn gostwng biliau am byth.
"Bydd y prosiectau newydd hyn yn y moroedd oddi ar arfordir Cymru yn ein helpu i gyflawni’r nodau hynny."
Dywedodd yr Ysgrifennydd Ynni, Ed Miliband: "Gyda’r canlyniadau hyn, mae Prydain yn adennill rheolaeth dros ein sofraniaeth ynni.
"Mae hon yn fuddugoliaeth hanesyddol i’r rhai sydd eisiau i Brydain sefyll ar ein traed ein hunain, gan reoli ein hynni ein hunain yn hytrach na dibynnu ar farchnadoedd sy'n cael eu rheoli gan betrwladwriaethau ac unbeniaid."
