Fe wnaeth teclyn tracio arwain at ddal dyn o Lanberis wnaeth ddwyn offer o safle ffilmio rhaglen deledu BBC, clywodd llys ddydd Mawrth.

Clywodd Llys yr Ynadon Caernarfon bod David Pugh, 25 oed, wedi dwyn dwy ferfa a chymysgwr sment o set ffilmio DIY SOS fis Rhagfyr 2025.

Fe gafodd ei gyhuddo o ladrata ar 8 Rhagfyr.

Roedd yr offer werth £1,600, ac roedd 'air tag', sef teclyn tracio wedi ei osod yn y cymysgwr sment.

Dywedodd cyfreithiwr David Pugh ei fod wedi bod allan yn yfed mewn tafarn leol ar y noson y cafodd y cyfarpar ei ddwyn.

Ychwanegodd fod Pugh wedi colli ei swydd ac yn cael trafferthion hawlio budd-daliadau ar y pryd.

Dywedodd ei fod wedyn wedi gwneud "penderfyniad anffodus," un mae'n ei "ddifaru'n fawr."

Gwthiodd y dyn 25 oed y cyfarpar i'w gartref yn Llainwen Isaf a'i guddio yn ei garej.

Ond fe gafodd yr offer ei ganfod a'i ddychwelyd o fewn 24 awr.

Wrth siarad yn y llys dywedodd cyfreithiwr Pugh nad oedd ei gleient "ar unrhyw adeg yn ymwybodol bod gan yr offer unrhyw beth i’w wneud â DIY SOS".

Ychwanegodd: "Iddo ef, dim ond cymysgydd sment a berfâu oedd o.

“Wrth edrych yn ôl, ac yn ymwybodol o’r amgylchiadau llawn, mae’n teimlo’n hynod o gywilyddus. Mae’n ymddiheuro’n ddiamod i unrhyw un sydd wedi eu heffeithio gan ei weithredoedd.”

Derbyniodd Pugh orchymyn cymunedol am hyd at 18 mis ac fe fydd angen iddo gwblhau 200 awr o waith di-dâl a gwisgo tag alcohol am 60 diwrnod.

Fe fydd hefyd angen iddo dalu costau o £199.