Mae dyn ifanc o Gymru, a oedd yn cael ei ystyried yn un o’r bobl ifancaf i ddioddef o glefyd niwronau echddygol (motor neuron disease), wedi marw yn 14 oed.

Roedd Kyle Sieniawski, o Bontypridd, wedi cael diagnosis o sglerosis ochrol amyotroffig (amyotrophic lateral sclerosis neu ALS), y ffurf fwyaf cyffredin o MND.

Yn ddiweddar roedd wedi cymryd rhan mewn treial clinigol i ymchwilio i driniaeth bosibl ar gyfer ei ffurf o ALS yng Ngholeg y Brenin yn Llundain.

Roedd cyflwr penodol Kyle yn un o’r ffurfiau mwyaf ymosodol o’r cyflwr.

Mewn datganiad ar grŵp Facebook a oedd wedi bod yn trafod cynnydd Kyle, dywedodd ei deulu ddydd Gwener:

“Rydyn ni’n torri ein calonnau wrth gyhoeddi bod ein harwr bach ni wedi colli ei frwydr yn erbyn MND yn anffodus iawn.

“Fe wnaeth Kyle ymladd gyda phopeth oedd ganddo, ond yn y diwedd daeth y cyfan yn ormod iddo ac, yn drist iawn, bu farw neithiwr.

“Does dim ffordd i ni ddisgrifio sut rydyn ni’n teimlo… rydyn ni wedi torri ein calonnau’n llwyr.

“Kyle… byddwn yn dy golli di gymaint, gyfaill, ac rydyn ni’n dy garu di fwy nag y gallai geiriau byth ei ddweud.

“Rydyn ni eisoes yn gallu dy ddychmygu di i fyny yno yn herio dy neiniau a’th deidiau i gêm o Connect 4… a’th fod di’n gwneud iddyn nhw wenu… yn union fel y gwnest ti i ni wenu filoedd o weithiau a mwy.

“Byddwn ni’n meddwl amdanat ti bob dydd, fachgen hardd… nes i ni gwrdd eto.”