Bydd Clwb Pêl-droed Everton yn datgelu "mainc sgwrsio" er cof am Gary Speed cyn eu gêm yn erbyn Newcastle ddydd Sadwrn.

Dywedodd y clwb bod y fainc yn "deyrnged barhaol i un o gyn-chwaraewyr y clwb sydd yn cael ei edmygu fwyaf."

Cafodd Gary Speed, a oedd yn gyn gapten Cymru a rheolwr y tîm cenedlaethol ar y pryd, ei ddarganfod yn farw yn ei gartref ym mis Tachwedd 2011.

Daw'r cyhoeddiad 14 mlynedd ers ei farwolaeth, a bydd ei deulu yn ymweld â'r fainc cyn y gêm ddydd Sadwrn.

Mae'r fainc yn lle i gefnogwyr allu siarad am iechyd meddwl gyda'r gobaith y bydd yn annog sgwrsio rhwng ffrindiau am eu teimladau.

Fe wnaeth Speed chwarae 58 o gemau i'r Toffees, gan sgorio 16 o goliau dros gyfnod o ddwy flynedd.

Bydd y fainc yn cynnwys y neges 'Er cof am Gary Speed, Evertonian, Capten, Arweinydd. 1969-2011. Lle ar gyfer yr hyn sydd yn aml ddim yn cael ei ddweud. Lle i eistedd, rhannu a gwrando.' (A place for what is often unspoken. A place to sit, share and listen)'

Bydd y fainc yn cael ei lleoli ar blaza'r cefnogwyr y tu allan i'r stadiwm, ac fe fydd staff yn yr ardal cyn y gemau i gefnogwyr gael cyfle i siarad â nhw am iechyd meddwl, ac i dderbyn cefnogaeth os oes angen.

Image

Dywedodd Neville Southall, un o gewri Everton ac un o gyn cyd-chwaraewyr Gary gydag Everton a Chymru bod y fainc er cof am Gary yn un "addas iawn."

“Fyddech chi byth yn cysylltu Gary â mainc, oherwydd roedd yn ymddangos bod ganddo bob dim, ond mewn sawl ffordd mae'n addas iawn.

"Os ydych chi'n eistedd yno ac yn meddwl bod bywyd pawb arall yn berffaith, gallwch chi feddwl am ddyn a oedd yn bêl-droediwr gwych ac yn rheolwr gwych - ond roedd gyda'i broblemau ei hun."

Fforwm Cefnogwyr Everton a wnaeth gynnig creu mainc er cof Gary, a hynny er mwyn ddathlu "ei waddol."

“Roedden ni eisiau cofio Gary Speed, a gobeithiwn y bydd y fainc hon yn dod yn waddol parhaol," meddai Dave Wycherley, Is-gadeirydd Fforwm Cefnogwyr Everton.

"Mae problemau'n teimlo'n ysgafnach pan maen nhw'n cael eu rhannu, ac mae Everton bob amser wedi bod yn glwb lle mae cefnogwyr yn cymysgu, yn siarad, ac yn dianc rhag pwysau bywyd am ychydig.

"Mae pêl-droed yn dangos cymuned allan ar ei gorau, ac mae bod yn yr awyr agored yn helpu'r sgyrsiau hynny i ddod yn naturiol.”