Bydd gan chwaraewyr dartiau llawr gwlad cyfle i "gyflwyno'u hunain i'r byd" wrth i S4C ddarlledu Pencampwriaeth Dartiau'r Byd y WDF o Lakeside yr wythnos nesaf.

Mae’r gystadleuaeth yn dyddio'n ôl i 1978 ac mae wedi cynnwys nifer o gewri’r byd dartiau dros y blynyddoedd, o'r pencampwr cyntaf Leighton Rees i bobl fel Phil Taylor, Raymond van Barneveld ac yn fwy diweddar Luke Littler.

Mae corff llywodraethu'r WDF yn cynnal Pencampwriaeth y Byd yn Lakeside yn Surrey i chwaraewyr llawr gwlad a lled-broffesiynol.

Fe fydd S4C yn darlledu gemau o'r ail rownd tan y rownd derfynol ym mhum teitl Pencampwriaeth y Byd - y dynion, menywod, bechgyn, merched a dartiau para.

Mae Dylan Williams, crëwr cyfrifon cyfryngau cymdeithasol Darts Cymru yn rhan o'r tîm sylwebu yn y gystadleuaeth eleni, ac yn dweud bod y gystadleuaeth yn rhoi profiad i chwaraewyr o chwarae ar lwyfan mawr ac o flaen y camerâu am y tro cyntaf.

"Ma’ Lakeside yn cael eu cysylltu gyda dartiau ledled y byd, mae e’n leoliad eiconig ac ma’ pawb sydd wedi mynd ‘mlaen i neud unrhyw beth yn y gamp wedi ‘whare ar y llwyfan eiconig ‘na," meddai wrth Newyddion S4C.

"Mae’r gystadleuaeth yn rhoi profiad i’r chwaraewyr fel Luke Littler a Beau Greaves o chwarae ar y llwyfan mawr o flaen camerâu teledu am y tro cyntaf.

"Dyw e ddim mor fowr a beth yw’r PDC [y corff llywodraethu dartiau proffesiynol], ond mae e’n ffordd o gallu cyflwyno dy hunan i'r byd ac i rywbeth gallai mynd yn fwy yn y dyfodol."

Image

Dyma drydydd darllediad pencampwriaeth dartiau ar S4C, wedi darllediadau Pencampwriaeth y Chwe Gwlad a Phencampwriaeth Agored Cymru dros yr haf.

Fe fydd Pencampwriaeth Dartiau'r Byd y PDC yn cael ei darlledu ar Sky Sports fis nesaf, gan olygu bod angen tanysgrifiad i'w wylio.

Bydd y bencampwriaeth ar S4C ar gael i wylio am ddim, ac mae hynny'n rhywbeth "pwysig" meddai Dylan.

"O ran S4C yn darlledu hyn, mae’n dod ar gefn darllediadau llwyddiannus iawn yn gynt yn y flwyddyn gyda’r Chwe Gwlad ym Merthyr a wedyn Pencampwriaeth Agored Cymru," dywedodd.

"Ac felly rydym yn adeiladu ar reiny, y ffigyrau gwylio ac adborth gan y gynulleidfa yn dilyn hynny.

"A pobl yn falch bod dartiau ar gael ar sianel free to air, achos mae’n gamp sydd wedi bod yn boblogaidd erioed yng Nghymru ac ma'n bwysig bod y gystadleuaeth hon am ddim i'w gwylio.

"Nawr ni’n gweld mwy o diriogaethau ar draws y byd yn cwympo mewn cariad â’r gêm a ni jyst yn gweld cryfder y darllediad gyda S4C a mae a mynd i ehangu a gobeithio gweld mwy o gystadlaethau yn 2026."

Darganfod y Luke Littler nesa?

Fe wnaeth Luke Littler greu hanes wrth fod y chwaraewr ieuengaf i ennill Pencampwriaeth Dartiau’r Byd y PDC y llynedd.

Yn 17 oed fe gurodd Littler Michael van Gerwen, sydd wedi ennill y bencampwriaeth deirgwaith, o 7-3 ym Mhalas Alexandra.

Cyn iddo symud i'r PDC roedd Littler yn cystadlu yn Lakeside, gan gyrraedd rownd yr 16 olaf yn 2022 pan oedd ond yn 15 oed.

Fe fydd sawl chwaraewr ifanc yn cystadlu yn y bencampwriaeth eleni, ond pwy yw'r rhai i edrych mas amdanynt?

"Ma’ na dri enw ifanc yn y gystadleuaeth sydd yn mynd i sefyll allan dwi’n meddwl," meddai Dylan.

"Ar ochr y bechgyn, ma’ ‘na ddau chwaraewr anhygoel o be fi ‘di gweld, Mitchell Lawrie o’r Alban a wedyn ei brif wrthwynebydd Kaya Baysal o Burnley.

"Ma’r ddou o nhw wedi ennill cystadlaethau yn yr ieuenctid ond hefyd cystadlu gyda’r dynion ac yn rhoi llond twll o ofn i ddynion sydd wedi bod yn chwarae ers deugain mlynedd.

"Ma’ sawl un wedi dweud bo’ nhw heb weld chwaraewyr yn debyg i’r ddau ‘ma.

"A be’ sy’n hala ofn ar dyn yw bod nhw’n torri records mae Luke Littler wedi gosod, ac yn gwneud pethau’n gynt na Luke, yn ennill cystadlaethau’n gynt ‘na fe."

Image

Un fenyw sydd wedi dal sylw yn y byd dartiau yn ddiweddar yw Beau Greaves - sydd bellach yn chwarae yn y PDC.

Fe fydd hi'n chwarae ym Mhalas Alexandra eleni wedi ei llwyddiant ysgubol yn y WDF gan ennill y gystadleuaeth dair gwaith.

Bydd Paige Pauling yn gobeithio gallu efelychu hynny, wedi iddi ennill Pencampwriaeth Merched y WDF y llynedd.

"Mae’n ennill popeth sydd o’i blaen hi yn y gêm merched ond hefyd mae nawr wedi symud mewn i’r cystadlaethau menywod," meddai Dylan.

"Ac eto mae hi'n ennill nifer o gystadlaethau ar y lefel hynny.

"Heb os fydd y tri ohonynt yn symud ymlaen i fod yn chwaraewyr proffesiynol a byddwn ni’n gweld nhw ar brif lwyfannau ar draws y byd."