Mae oriawr boced aur gan gwpl oedrannus a foddodd yn ystod suddo'r Titanic wedi'i gwerthu am £1.78 miliwn mewn ocsiwn.

Dyma'r swm uchaf a dalwyd erioed am atgofion y Titanic, meddai'r arwerthwyr.

Gosodwyd y record flaenorol y llynedd pan werthwyd oriawr boced aur arall a gyflwynwyd i gapten cwch a achubodd fwy na 700 o deithwyr o'r llong am £1.56 miliwn.

Roedd yr oriawr 18-carat Jules Jurgensen yn eiddo i'r teithiwr dosbarth cyntaf Isidor Straus, a foddwyd pan suddodd y llong ym mis Ebrill 1912, gyda 1,500 o bobl yn colli eu bywydau.

Cafodd ef a'i wraig Ida eu portreadu yn ffilm Titanic James Cameron ym 1997 fel y cwpl yn cofleidio’i gilydd wrth i'r Titanic suddo.

Roedd yr oriawr wedi stopio am 02.20, y foment y diflannodd y Titanic o dan y tonnau.

Cafodd yr oriawr ei hadfer o gorff Mr Straus ynghyd ag eiddo personol eraill a'i dychwelyd i'w deulu.

Roedd wedi derbyn yr oriawr yn 1888 fel anrheg ar gyfer ei ben-blwydd yn 43 oed – yr un flwyddyn ag y daeth yn bartner yn siop adrannol enwog Macy’s yn Efrog Newydd.

Image

Yn ystod noson y suddo, fe wnaeth y cwpl cyfoethog eu ffordd i ddec y Titanic.

Pan gynigiwyd sedd ar fad achub i Mr Straus oherwydd ei oedran, dywedodd na fyddai’n mynd o flaen dynion eraill.

Gwrthododd Mrs Straus adael ei gŵr, a gwelwyd nhw ddiwethaf yn fyw yn eistedd ar gadeiriau'r dec, yn wynebu eu tynged wrth ochr ei gilydd.

Roedd y ddau ymhlith ychydig iawn o deithwyr dosbarth cyntaf i farw yn y drychineb. Gwerthwyd yr oriawr, a oedd wedi aros yn nheulu Mr a Mrs Straus, yn yr arwerthwyr Henry Aldridge & Son Auctioneers yn Devizes, Wiltshire.

Fe brynwyd llythyr a ysgrifennwyd gan Mrs Straus ar ddeunydd ysgrifennu Titanic a'i bostio tra ar fwrdd y llong am £100,000.

Prynwyd rhestr deithwyr Titanic am £104,000.

At ei gilydd cyrhaeddodd arwerthiant cofroddion sy'n gysylltiedig â'r Titanic £3 miliwn ddydd Sadwrn.

Cafodd Mr Straus ei eni i deulu Iddewig yn Otterberg, Bafaria, yn 1845, ac fe fe ymfudodd i'r Unol Daleithiau gyda'i deulu ym 1854.

Ym mis Ionawr 1912, fe deithiodd gyda'i wraig ar yr RMS Caronia i Jerwsalem cyn dychwelyd i'r Unol Daleithiau trwy Southampton ar y Titanic.

Dywedodd yr arwerthwr Andrew Aldridge: "Mae'r pris record byd yn dangos y diddordeb parhaus yn stori'r Titanic."

"Roedd gan bob dyn, menyw a phlentyn, teithiwr neu griw, stori i'w hadrodd ac fe'u hadroddir 113 mlynedd yn ddiweddarach trwy'r atgofion."