Mae rhybuddion am amodau gyrru "hynod o wael" yn ne-orllewin Cymru fore Iau a nifer o ysgolion ar gau wedi i eira syrthio dros nos.

Dywedodd Cyngor Sir Benfro bod rhannau o orllewin y sir wedi gweld "eira trwm" a'u bod nhw'n canolbwyntio ar ail-agor y ffyrdd, gyda ffyrdd oedd heb eu trin yn "beryglus".

Mae eira hefyd wedi syrthio yng ngorllewin Sir Gaerfyrddin a de Sir Ceredigion.

Mae rhybudd melyn am eira mewn grym yng Ngheredigion, Sir Gaerfyrddin, Sir Benfro ac Abertawe drwy’r dydd ddydd Iau.

Dywedodd Shon Rees, Cynghorydd Crymych a Mynachlog-ddu wrth Radio Cymru mai "dyma'r mwyaf o eira' ydw i wedi ei weld yng Nghrymych yn yr 20 mlynedd diwetha'".

"Daeth e lawr o tua 03.00 ymlaen yn ofnadw. Ydi mae pobl wir am dduno lan bore 'ma ac edrych mas a meddwl ydi hi'n saff mynd.

"Byddwn i'n argymell i unrhyw un sydd ddim rhaid teithio heddi' i aros gytre'."

Image

Mae nifer o ysgolion ar gau.

Yn Sir Benfro:

• Ysgol Bro Preseli - y cynradd a’r uwchradd - yng Nghrymych
• Ysgol Uwchradd Greenhill
• Ysgol Uwchradd Hwlffordd
• Ysgol Uwchradd Bro Gwaun
• Ysgol Gymunedol Maenclochog
• Ysgol Llandudoch
• Ysgol Gynradd Gymunedol Eglwyswrw
• Ysgol Tredeml
• Ysgol Tafarn-sbeit
• Ysgol Portfield yn Hwlffordd
• Ysgol Caer Elen yn Hwlffordd
• Ysgol Prendergast yn Hwlffordd
• Ysgol Cilgerran
• Ysgol Cosheston
• Ysgol Gynradd Arberth
• Ysgol Sant Aidanes
• Ysgol Bro Ingli
• Ysgol Gymunedol Brynconin yn Llandissilio
• Ysgol Harri Tudur
• Ysgol Sant Oswald
• Ysgol Sant Teilo
• Ysgol Stepaside
• Ysgol Clydau - Tegryn
• Ysgol Llanychllwydog - Dyffryn Gweun
• Ysgol Wolfcastle
• Ysgol Hafan y Môr

Yn Sir Gaerfyrddin:

• Ysgol Dyffryn Taf yn Hendy-gwyn ar Daf
• Ysgol Bro Brynach
• Ysgol Emlyn
• Ysgol y Ddwylan
• Ysgol Beca, Efailwen
• Ysgol Gynradd Pwll ger Llanelli
• Ysgol Lacharn
• Ysgol Llanmiloe
• Ysgol Llys Hywel
• Ysgol Griffith Jones
• Ysgol Hafodwenog
• Ysgol Penboyr

Ceredigion:

• Ysgol Uwchradd Aberteifi
• Ysgol Gynradd Aberteifi
• Ysgol Gynradd Aberporth
• Ysgol Gynradd Llechryd
• Ysgol Gynradd Cenarth
• Ysgol Gynradd T Llew Jones
• Ysgol Gynradd Penparc

Dywedodd y Swyddfa Dywydd y gallai’r tywydd gaeafol wneud gyrru yn beryglus, ac roedd disgwyl hyd at 10cm o eira ar dir uchel yn Sir Benfro a gorllewin Sir Gaerfyrddin.

Dywedodd Heddlu Dyfed-Powys fore Iau fod amodau’r ffyrdd yn “hynod o wael” ar draws Aberteifi yng Ngheredigion oherwydd yr eira.

Roedd y ffyrdd yn Sir Benfro rhwng Tredeml a Thafarn-sbeit ger Arberth, a’r A4075 rhwng Penfro a Nash, ar gau oherwydd yr eira.

Roedd amodau gyrru yn “hynod o wael” rhwng Sanclêr a Hwlffordd, a Tyddewi a Hwlffordd, ar yr A40, medden nhw.

Image

Roedd rhybudd gan Heddlu Gogledd Cymru nos Fercher fod yr A55 rhwng cyffyrdd pedwar a phump yn wyn oherwydd eira.

Yn Swydd Efrog yng ngogledd-ddwyrain Lloegr roedd amodau "storm eira" yn bosib wrth i rybudd ambr ddod i rym ddydd Iau.

Gallai cymaint â 25cm o eira ddisgyn ar dir uchel yng Ngogledd Efrog a'r ardal gyfagos, lle mae'r rhybudd ambr yn parhau mewn grym tan 21.00.

Mae'r rhan helaeth o ogledd yr Alban yn wynebu rhybudd melyn am eira a rhew, sydd wedi bod mewn grym drwy gydol yr wythnos, ac a fydd yn dod i ben am 21.00 ddydd Iau.

Llun gan Julia James.