Mae sgwâr mewn pentref  yn Y Swistir wedi cael ei enwi er cof am y Cymro a’r actor byd-enwog, Richard Burton. 

Cafodd yr enw ei ddadorchuddio yn rhan o ddigwyddiadau i nodi 100 mlynedd ers genedigaeth y seren Hollywood ym Mhontrhydyfen, Castell-nedd Port Talbot yn 1925. 

Cafodd Richard Burton ei enwebu am sawl Gwobr yr Academi yn ystod ei yrfa yn y byd ffilm a theatr. 

Ymhlith rhai o'i ffilmiau mawr, roedd Cleopatra, Who’s Afraid of Virginia Woolf?, a The Spy Who Came in from the Cold. 

Fe ymgartrefodd ym mwrdeistref Céligny ger Genefa yn y Swistir, o 1957 hyd at ei farwolaeth yn 1984.

Mae plac bellach wedi cael ei ddadorchuddio yn yr ardal, ar ôl i sgwâr y pentref gael ei ail-enwi er cof amdano.

Mae’r sgwâr bellach yn cael ei adnabod fel ‘Place Richard Burton’.

'Talent Cymru'

Yn dilyn y digwyddiad, roedd yna daith gerdded i fynwent Céligny lle cafodd Richard Burton ei gladdu. 

Cafodd un o gerddi ei ffrind agos, Dylan Thomas, ei ddarllen yno er mwyn cofnodi'r achlysur. 

Roedd Gweinidog Diwylliant Llywodraeth Cymru, Jack Sargeant yn bresennol yn y digwyddiad. Dywedodd bod y seremoni yn gyfle i ddathlu “nid yn unig ei fywyd, ond dylanwad parhaol ei waith, ei wreiddiau Cymreig, a'i gyrhaeddiad byd-eang.

"Ni anghofiodd Richard Burton erioed ei dreftadaeth Gymreig – roedd ei lais unigryw yn cario hanfod Cymru i'r dychymyg byd-eang. 

“Mae ei daith o Gymru i enwogrwydd rhyngwladol yn dangos sut mae diwylliant a thalent Cymru yn parhau i atseinio ledled y byd," meddai.