Mae campfa newydd sbon ar leoliad hen ysgol uwchradd yng Ngheredigion wedi ei difrodi gan dân lai na phythefnos ers iddi agor ei drysau.

Cafodd y gwasanaeth tân eu galw i Y Gampfa, Llandysul yn ystod oriau man y bore dydd Iau, 13 Tachwedd.

Agorodd Y Gampfa ei drysau ar 1 Tachwedd ar hen safle Ysgol Dyffryn Teifi, a gaeodd yn 2016.

Ond mae'r perchnogion bellach yn dweud y bydd ar gau am rai wythnosau wrth i'r heddlu ymchwilio i'r hyn achosodd y tân ac wrth i'r difrod gael ei drwsio.

Dywedodd un o reolwyr Y Gampfa, James Turner, bod hwn yn ddatblygiad “hynod o siomedig” i’r fenter newydd, ond bod ymateb y gymdeithas wedi bod yn “galonogol dros ben.”

“Rydyn ni wedi cael ymatebion cadarnhaol iawn ar y cyfryngau cymdeithasol, yn ysgrifennu atom i ddweud fod gennym ni cefnogaeth y gymuned” meddai.

“Mae cael yr ymateb hwnnw wedi bod yn anhygoel. Mae'n ei wneud yn gwbl werth chweil ac wedi rhoi'r hyder i ni i gael yn ôl ar ein traed yn fuan."

Image

Nod Y Gampfa, yn ôl James, oedd cynnig lleoliad i’r gymuned leol allu ymarfer corff, yn lle gorfod teithio dros 30 munud i’w cyfleusterau agosaf.

“Fe wnes i siarad gyda’r boblogaeth leol, a oedden nhw yn gweiddi am gyfleusterau campfa well yn nes at adref," meddai.

“Rydyn ni wedi cael ymateb hynod o gadarnhaol gyda dros 200 o aelodau yn cofrestru dros ein penwythnos agoriadol.” 

Image

Mae James yn gobeithio bydd Y Gampfa yn gallu cael effaith bositif ar y gymuned, ac yn helpu i hybu'r economi yn lleol.

“Bysai llwyddiant i mi yn golygu bod Y Gampfa yn gallu ffynnu, nid yn unig fel menter fasnachol, ond ei bod yn cael ei gweld fel rhywbeth da i'r dref hefyd," meddai.

“Rydym ni yn ymwybodol iawn o ein rôl o fewn y gymuned ehangach, ac yn ei gymeryd o ddifri.”

Chafodd neb ei anafu yn y tân, yn ôl James, ac maent yn gobeithio y byddant yn gallu ail-agor eu drysau yn fuan.