Dyma gipolwg ar gemau nos Wener y Cymru Premier JD.

Met Caerdydd (6ed) v Llansawel (9fed) | Nos Wener – 19:45

Mae Met Caerdydd yn ôl yn yr hanner uchaf yn dilyn buddugoliaeth haeddiannol yn erbyn Y Seintiau Newydd nos Wener ddiwethaf (YSN 2-3 Met).

Mae carfan Ryan Jenkins wedi codi’r safon yn ddiweddar gan ennill chwech o’u wyth gêm ddiwethaf i ddringo o waelodion y tabl i’r 6ed safle.

Bydd Llansawel yn llawn hyder hefyd ar ôl hawlio eu buddugoliaeth gyntaf gartref yn y gynghrair ers mis Mawrth drwy guro’r Bala o 2-0 ar yr Hen Heol nos Wener.

Dyw Llansawel m’ond driphwynt uwchben safleoedd y cwymp, ond pe bae nhw’n ennill nos Wener yma, yna byddai dynion Andy Dyer ond dau bwynt y tu ôl i Met Caerdydd (6ed) gyda gêm wrth gefn.

Gorffennodd hi’n 1-1 yn y gêm gyfatebol rhwng y ddau dîm ym mis Awst ble sgoriodd Ruben Davies i Lansawel cyn i Jasper Payne unioni i’r myfyrwyr yn erbyn ei gyn-glwb.

Record cynghrair diweddar: 

Met Caerdydd: ͏✅➖✅❌✅

Llansawel: ͏✅❌❌❌✅

Y Fflint (10fed) v Y Seintiau Newydd (1af) | Nos Wener – 19:45

Daeth rhediad rhagorol Y Seintiau Newydd o 13 buddugoliaeth yn olynol i ben nos Wener wrth i’r pencampwyr golli gartref yn erbyn Met Caerdydd.

Yn ymateb i’r golled, dywedodd rheolwr y Seintiau, Craig Harrison bod perfformiad amddiffynnol ei dîm wedi bod yn chwerthinllyd ac mi fydd yn sicr yn disgwyl gwell gan ei garfan broffesiynol y penwythnos yma.

Ar ôl sicrhau dim ond un pwynt o’u tair gêm ddiwethaf mae’r Fflint wedi llithro i’r 10fed safle, dau bwynt uwchben safleoedd y cwymp.

Dyw’r Fflint heb guro’r Seintiau ers 30 mlynedd, ac yn y saith gornest ddiwethaf rhwng y clybiau mae’r Seintiau wedi sgorio cyfartaledd o 5.6 gôl y gêm, yn cynnwys buddugoliaethau swmpus o 8-1, 7-0 a 6-2.

Record cynghrair diweddar:

Y Fflint: ❌✅❌❌➖

Y Seintiau Newydd: ✅✅✅✅❌